ضلعی ، اسمبلی اور بلاک سطح کے قائدین سے مشاورت کے بعد4 ڈسمبر کو حیدرآباد واپسی
حیدرآباد : 28 نومبر ( سیاست نیوز) صدرنشین تلنگانہ ریاستی وقف بورڈ عظمت اللہ حسینی نے بحیثیت اے آئی سی مبصر دو اضلاع کے کانگریس صدور کا انتخاب کرنے کیلئے ٹاملناڈو کے دورہ پر ہیں ۔ کانگریس ہائی کمان نے سنگھٹن سریجن ابھیان پروگرام کے تحت ٹاملناڈو کے دو اضلاع مدرائے ساؤتھ اور تھینی کے کانگریس صدور کا انتخاب کرنے کی ذمہ داری سید عظمت اللہ حسینی کو سونپی ہے ۔ ہائی کمان سے ہدایت ملنے کے بعد عظمت اللہ حسینی دو دن قبل ٹاملناڈو کے دورہ پر پہہنچ گئے ہیں جہاں وہ 3 ڈسمبر تک قیام کرتے ہوئے دونوں اضلاع کے 7 اسمبلی حلقوں کے پارٹی قائدین سے ملاقات کرتے ہوئے ضلع صدر کا انتخاب کرنے کیلئے رائے حاصل کریں گے ۔ سید عظمت اللہ حسینی نے بتایا کہ دونوں اضلاع میں وہ پہلے ضلع سطح کے کانگریس قائدین سابق ارکان اسمبلی و اہم قائدین سے ملاقات کریں گے ۔ اس کے بعد اسمبلی سطح ، پھر بلاک سطح کے پارٹی قائدین سے ملاقات کرتے ہوئے ضلع صدور کا انتخاب کرنے کیلئے رائے حاصل کریں گے ۔ مختلف اُمور پر پارٹی کے مقامی قائدین سے تبادلہ خیال کریں گے ، 4 ڈسمبر کو حیدرآباد واپس ہوجائیں گے ۔ انہوں نے کہا کہ کانگریس پارٹی ہائی کمان کی جانب سے سارے ملک میں کانگریس ضلعی صدور کا انتخاب کرنے کیلئے خصوصی مہم شروع کی گئی ہے ۔ پارٹی ہائی کمان نے انہیں پہلے چھتیس گڑھ کے تین اضلاع کے صدور کا انتخاب کرنے کی ذمہ داری سونپی تھی ، وہ مقررہ وقت پر دی گئی ذمہ داری کو بخوبی نبھا چکے ہیں جس کے بعد کانگریس ہائی کمان نے اب ٹاملناڈو کے دو اضلاع کی ذمہ داری دی ہے ۔ وہ ٹاملناڈو کے دو اضلاع میں پارٹی قائدین سے متحدہ اور شخصی ملاقاتیں کررہے ہیں ۔ دونوں اضلاع کے صدور کیلئے پارٹی قائدین کی ایک رپورٹ تیار کرتے ہوئے دہلی میں کانگریس کے قومی جنرل سکریٹری و انچارج تنظیمی اُمور سی وینوگوپال کو پیش کریں گے ۔2
