وجئے واڑہ : طوفان نیوار کے زیر اثر اے پی کے اضلاع چتور،نیلور،کڑپہ اور پرکاشم میں مسلسل بارش کے نتیجہ میں کئی مواضعات سے سڑک کا رابطہ ٹوٹ گیا،ہزاروں ایکڑ پر پھیلی فصلیں محصور ہوگئیں،سینکڑوں بجلی کے پولس اکھڑ گئے ۔نیلور ضلع میں ہائی ٹنشن بجلی کا تار ٹوٹ کر گرنے کے نتیجہ میں ایک شخص ہلاک ہوگیا جس کی شناخت عبدالرزاق کے طورپر کی گئی ہے ۔ریاست میں کئی نہریں لبریز ہوگئی ہیں اور کئی نالے اُبل پڑے ۔آبپاشی کے تمام تالابوں کی سطح میں اضافہ ہوگیا ہے ۔اضلاع نیلور و کڑپہ میں تقریبا 6000افراد کو محفوظ مقامات پر منتقل کردیا گیا ۔ نیلور کے وینکٹ گری۔راپور روڈ پُل میں شگاف پڑگیا۔عہدیداروں نے اس پُل پر سے کسی گاڑی کو گذرنے کی اجازت نہیں دی اسی لئے جانی نقصان نہیں ہوا ۔ سینکڑوں بجلی کے پولس اور درخت کڑپہ اور نیلور میں اکھڑگئے جس سے میں کئی مواضعات میں بجلی کی سپلائی رک گئی۔کئی دوردراز کی سڑکیں اور شاہراہیں گھٹنوں بھر پانی میں ڈوب گئیں جس سے ان اضلاع میں عام زندگی مفلوج ہوگئی اور سینکڑوں مواضعات تک سڑک کارابطہ ٹوٹ گیا۔وزرا انل کماریادو،ایم گوتم ریڈی اور ضلع کلکٹر سی بابو نے نیلور کے شدید متاثر علاقوں کا دورہ کیا اور صورتحال پر نظر رکھی ۔ تمام تعلیمی اداروں کو پیر تک تعطیل کا اعلان کردیاگیا۔ ذرائع نے کہا کہ 1600آبپاشی تالاب لبریز ہوگئے ہیں۔کڑپہ کے ریلوے کڈور منڈل کے بالاپلی۔کُکلاڈوڈی کے درمیان شاہراہ 50میٹر تک بہہ گئی جس کے نتیجہ میں کڑپہ تاتروپتی کے درمیان ٹریفک رک گئی اور سڑک کے دونوں کنارے سینکڑوں گاڑیاں رکی ہوئی ہیں آبگیر علاقوں میں شدید بارش سے دریائے گنجنا میں تیز موجیں دیکھی جارہی ہیں۔ریلوے کڈور،راجم پیٹ،رائے چوٹی کے کئی رہائشی علاقے زیرآب آگئے ۔اضلاع کرشنا، گنٹور، مغربی گوداوری میں بارش سے ہزاروں ایکڑ فصلوں کو نقصان پہنچا۔اسی دوران چیف منسٹر جگن موہن ریڈی نے صورتحال پر عہدیداروں کے ساتھ جائزہ لیا۔حکام نے انہیں نیلور،کڑپہ اور چتور میں طوفان کے اثرات سے واقف کروایا۔ جگن نے ہدایت دی کہ نیلور میں فوت شخص کے خاندان کی مدد کی جائے۔عہدیداروں نے وزیراعلی کو بتایا کہ تین کسان چتور ضلع کے یرپاڈو منڈل کی میلامڈگو نہر میں پھنس گئے جن کو بچانے کی کوششیں کی جارہی ہین۔وزیراعلی نے عہدیداروں کو ہدایت دی کہ وہ بارش کے متاثرین کی مدد کی جائے ۔
