آکلینڈ: نیوزی لینڈ سے امریکہ جانے والا طیارہ 16 گھنٹے کی پرواز کے بعد واپس وہیں آگیا جہاں سے پرواز بھری تھی۔عالمی خبر رساں ادارے کے مطابق آکلینڈ سے اْڑان بھرنے والی ایئر نیوزی لینڈ کی فلائٹ 16 گھنٹے کی مسافت طے کرنے کے بعد امریکہ پہنچی تو اسے واپس جانے کا کہہ دیا گیا اور یوں طیارہ واپس آکلینڈ آگیا۔ایئرلائن کی جانب سے جاری بیان میں کہا گیا ہے کہ امریکی ایئرپورٹ کے ٹرمینل پر آتشزدگی کی وجہ سے پرواز کو کسی اور ایئرپورٹ لے جانے کو کہا گیا لیکن دوسرے امریکی ہوائی اڈے پر اترنے سے کاروباری سرگرمیوں میں بہت زیادہ خلل پڑتا اس لئے طیارے کو واپس لانا پڑا۔ایئر لائن نے اپنے بیان میں مزید کہا کہ کسی اور امریکی ایئرپورٹ پر طیارہ اُتارتے تو طیارہ کئی دنوں تک وہیں کھڑا رہتا جس سے متعدد دیگر شیڈول سروسز اور صارفین متاثر ہوتے۔یوٹرن فلائٹ سے آکلینڈ واپس آنے والے مسافروں کو دیگر پروازوں کے ذریعے امریکا روانہ کردیا گیا۔
