کراچی ۔ 23ڈسمبر (سیاست ڈاٹ کام ) پاکستانی کرکٹر عابد علی نے انٹرنیشنل کرکٹ میں آمد کے ساتھ ہی اپنی صلاحیتیں منوانے لگے اور ہر گزرتے دن کے ساتھ وہ نت نئے ریکارڈز قائم کرتے جا رہے ہیں۔ دوسرے ٹسٹ میچ میں بھی سنچری اسکور کی اور سیریز کے بہترین کھلاڑی کا اعزاز حاصل کیا۔ عابد علی نے سری لنکا کے خلاف ٹسٹ سیریز میں متعدد ریکارڈز کے ساتھ ساتھ ایک اور منفرد ریاکرڈ بھی اپنے نام کر لیا۔ سری لنکا کے خلاف پہلے ٹسٹ میچ میں سنچری بنا کر مین آف دی میچ کا ایوارڈ اپنے نام کرنے والے عابد علی نے دوسرے میچ میں بھی بہترین کھیل کا مظاہرہ کرتے ہوئے میچ کے بہترین کھلاڑی کا ایوارڈ جیت لیا۔ اس کے ساتھ ہی عابد علی پاکستان کرکٹ کی تاریخ میں کیریئر کے ابتدائی دونوں ٹسٹ میچوں میں مین آف دی میچ کا ایوارڈ جیتنے والے پہلے کھلاڑی بن گئے ہیں ۔ یاد رہے کہ اوپنرعابد علی سری لنکا کے خلاف راولپنڈی ٹسٹ میچ میں سنچری کی بدولت ٹسٹ اور ونڈے ڈیبیو پر سنچری بنانے والے دنیا کے پہلے بیٹسمین بن گئے تھے۔ ایک دہے سے زائد ڈومیسٹک کرکٹ میں رنز کے انبار لگا کر صلاحیتوں کا لوہا منوانے والے بیٹسمین کراچی ٹسٹ میں سنچری کی بدولت ابتدائی 2 میچوں میں لگاتار دو سنچریاں بنانے والے پہلے پاکستانی بیٹسمین بن گئے تھے۔ اس کے علاوہ عابد نے اپنے ابتدائی 2 ٹسٹ میچوں کی 3 اننگز میں 321 رنز بناکر جاوید میانداد کا پرانا ریکارڈ بھی توڑ دیا تھا جنہوں نے ابتدائی دو ٹسٹ میچوں کی 3 اننگز میں 319 رنز بنائے تھے۔
