نیویارک: عراق اور شام پر حالیہ کیے گئے امریکی حملوں کے حوالے سے اقوامِ متحدہ کی سلامتی کونسل کا اجلاس کل طلب کر لیا گیا۔ میڈیا کے مطابق روس کی درخواست پر سلامتی کونسل کا اجلاس بلایا گیا ہے۔ روس نے عراق اور شام پر امریکہ اور برطانیہ کے مشترکہ حملوں کی مذمت بھی کی ہے۔روسی وزارتِ خارجہ کی ترجمان کا کہنا ہے کہ امریکہ نے ایک بار پھر بین الاقوامی قوانین کی بے توقیری کا مظاہرہ کیا ہے اور ان حملوں میں عام شہری مارے گئے۔دوسری جانب امریکہ اور برطانیہ نے یمن میں کچھ گھنٹوں کے دوران 48 مقامات پر حملے کیے ہیں۔ترجمان حوثی ملیشیا کے مطابق حملے یمن کے حوثیوں کو ان کے مقاصد سے نہیں روک پائیں گے۔ یہ حملے غزہ کے لیے ہمیں ہمارے اخلاقی، مذہبی اور انسانی مؤقف سے پیچھے نہیں ہٹائیں گے۔امریکی سینٹرل کمانڈ کے مطابق کروز میزائل سے بحیرہ احمر میں بحری جہازوں کو نشانہ بنانے کی تیاری کی جا رہی تھی، میزائل خطے میں امریکی بحریہ کے جہازوں اور تجارتی جہازوں کے لیے خطرہ تھا۔امریکی سینٹرل کمانڈ کی جانب سے کہا گیا ہے کہ امریکی کارروائی نیوی گیشن کی آزادی کا تحفظ کرے گی۔