نئی دہلی۔11اپریل (سیاست ڈاٹ کام) ہندوستان کے سب سے عمردراز فرسٹ کلاس کرکٹروں میں سے ایک والٹر ڈی سوزا کا اپنی رہائش گاہ پر انتقال ہوگیا۔ وہ 93 سال کے تھے اور نیند میں ہی انہوں نے دنیا کو الوداع کہہ دیا۔ انہوں نے کھار میں واقع اپنی رہائش گاہ پر آخری سانس لی۔ ڈی سوزا کے انتقال سے پوری کھیل دنیا صدمے میں ہے۔ ڈی سوزا سب سے عمر دراز فرسٹ کلاس کرکٹر تھے۔ انہوں نے گجرات اور اے سی سی کیلئے کھیلا ہے۔ انہوں نے اندور میں ہولکر ٹیم کے خلاف گجرات کیلئے 1950-51 میں رhنجی ٹرافی کا فائنل کھیلا تھا ، جس میں انہوں نے 50 اور 77 رن بنائے تھے۔ گجرات کے سابق کوچ وجے پٹیل نے ڈی سوزا کے ساتھ گزارے اچھے لمحات کو یاد کرتے ہوئے کہا کہ انہوں نے 2017 میں بریبان اسٹیڈیم کا دورہ کیا تھا ، جہاں ایرانی کپ کا ایک میچ کھیلا جانا تھا۔ وجے نے کہا کہ اس سال گجرات کے رانجی ٹرافی جیتنے کے بعد ہم نے انہیں ایرانی کپ کیلئے مدعو کیا تھا۔ اس وقت وہ 90 سال کے تھے۔ وہ اس وقت آئے اورکھلاڑیوں سے بات چیت کی۔ وہ کافی یادگار دوپہر تھی۔ڈی سوزا کا فرسٹ کلاس کیریئر تقریبا 20 سال کا رہا۔ انہوں نے 1947 سے 1966 تک کرکٹ کو اپنا وقت دیا۔ اس لیجنڈ کرکٹر نے گجرات کی جانب سے 16 میچ کھیلے ہیں۔ 27 اننگز میں انہوں نے 35.69 کی اوسط سے 821 رن بنائے۔
