لندن : برطانیہ کی ناز شاہ پارلیمان میں تقریر کے دوران اسرائیلی بمباری میں غزہ کے بچوں کے قتل عام کا تذکرہ کرتے ہوئے جذبات پر قابو نہ پاسکیں اور رونے لگیں۔ برطانوی رکن پارلیمنٹ ناز شاہ اسمبلی اجلاس میں اسرائیلی بمباری میں غزہ کے بچوں کی ہلاکت کا تذکرہ کرتے ہوئے کہا کہ ایک ویڈیو جسے دیکھ کر میں جذبات پر قابو نہیں پاسکی۔اس ویڈیو میں جب بچی کو ملبے سے نکالا گیا تو اس نے بڑی معصومیت سے پوچھا کہ کیا میں مرگئی ہوں اور کیا آپ مجھے دفنانے کیلئے قبرستان لے جا رہے ہیں۔ ناز شاہ نے روتے ہوئے کہا کہ اس عمر کے بچے قبرستان کی بات نہیں کرتے وہ تو کھیل کود اور میدان کی باتیں کرتے ہیں لیکن غزہ کے بچے قبرستان کو یاد کر رہے ہیں۔برطانوی ایم پی نے اپنی حکومت سے سوال کیا کہ اقوام متحدہ کے سکریٹری جنرل انتونیو گوتریس نے غزہ کو بچوں کا قبرستان قرار دیا لیکن ہمارا ملک کب غزہ میں خوں ریزی رکوانے کے لیے عملی کام کرے گا۔غزہ میں بچوں کی ہلاکتوں اور خوراک کی کمی پر یونیسیف اور سیو دی چلڈرن نامی تنظیموں نے بھی اپنی رپورٹس میں بتایا کہ 7 اکتوبر سے غزہ میں جاں بحق بچوں کی تعداد 5 ہزار سے تجاوز کرگئی۔
