برسلز: یورپی کمیشن کی صدر ارسلا وون ڈیر لیین نے غزہ میں جاری صورتحال کے بارے میں ایک مرتبہ پھر خبردار کیا ہیکہ غزہ میں اس وقت قحط کا سامنا ہے۔ اس سے نمٹنے کیلئے فوری جنگ بندی کی ضرورت ہے۔ ڈیر لیین نے اس امر کا اظہار قاہرہ میں صدر السیسی کے ساتھ اسٹرٹیجک پارٹنر شپ کے معاہدے پر دستخط کرنے کے بعد رپورٹرز سے گفتگو کرتے ہوئے کیا۔ یورپی کمیشن کی صدر نے کہا کہ غزہ میں قحط کا سامنا ہے اور ہم یہ قبول نہیں کر سکتے ہیں۔ اس لیے اب ضرورت ہے کہ بہت تیزی کے ساتھ جنگ بندی کی طرف بڑھا جائے۔ ایک ایسا جنگ بندی معاہدہ جس کے نتیجے میں اسرائیلی یرغمالی رہا ہوں اور غزہ میں انسانی بنیادوں پر مزید امداد کی ترسیل ممکن ہو سکے۔اس موقع پر مصر کے صدر السیسی نے کہا کہ مصر اور یورپی رہنماؤں نے رفح میں اسرائیل کے زمینی حملے کو متفقہ طور پر رد کردیا ہے۔ ان کا مزید کہنا تھا اگر رفح پر بھی زمینی حملہ کیا گیا تو یہ غزہ میں ہونے والی انسانی تباہی کو دوگنا کر دے گا۔
