کلکٹریٹ سنگاریڈی میں میڈیا سنٹر کا افتتاح، ضلع کلکٹر کا خطاب، سہولیات کا بھی جائزہ
سنگاریڈی۔ 28 نومبر ( سیاست ڈسٹرکٹ نیوز ) پی پراونیا ڈسٹرکٹ الیکشن آفیسر و کلکٹر ضلع سنگاریڈی نے چندر شیکھر اڈیشنل کلکٹر لوکل باڈیز کے ہمراہ کلکٹریٹ سنگاریڈی کے ڈی پی آر او آفس میں گرام پنچایت انتخابات کے لیے میڈیا سنٹر اور میڈیا سرٹیفیکیشن اینڈ مانیٹرنگ سیل (MCMC) کا افتتاح کیا۔ انہوں نے میڈیا کے لیے دستیاب سہولیات اور ایم سی ایم سی کے فرائض کی انجام دہی کے انتظامات کا معائنہ کیا۔ اس موقع پر کلکٹر نے کہا کہ گرام پنچایت انتخابات سے متعلق معلومات پرنٹ اور الیکٹرانک میڈیا کو میڈیا سنٹر کے ذریعہ فراہم کی جائیں گی۔ ریاستی الیکشن کمیشن کی ہدایت کے مطابق ضلعی سطح پر میڈیا سرٹیفیکیشن اینڈ مانیٹرنگ سیل قائم کیا گیا ہے۔ MCMC سیل کو پیڈ نیوز کی نشاندہی کرنی چاہیے اور انتخابی مہم کے اشتہارات کی بروقت اجازت دینی چاہیے۔ سوشل میڈیا پر آنے والی پوسٹس پر نظر رکھی جائے اور انتخابی ضابطہ اخلاق کی خلاف ورزی کرنے والے پوسٹس کی
نشاندہی کرتے ہوے الیکشن حکام کے علم میں لائیں۔ انہوں نے کہا کہ انتخابی ضابطہ اخلاق کی خلاف ورزی کرنے والی پوسٹوں کے خلاف قانون کے مطابق کارروائی کی جائے گی۔ کلکٹر نے میڈیا سے درخواست کی کہ وہ انتخابات کو شفاف اور غیر جانبدارانہ انداز میں کرانے میں تعاون کریں۔ اس موقع پر چندر شیکھر اڈیشنل کلکٹر لوکل باڈیز، ایم سی ایم سی کمیٹی کے ارکان، ڈی پی آر او وجے لکشمی، ایڈیشنل پی آر او ایڈوکنڈالو، ٹی یو ڈبلیو جے آئی جے یو سنگاریڈی ضلع صدر بنڈارو یادگیری کے علاوہ میڈیا کے نمائندے، ڈی پی آر او آفس کا عملہ اور دیگر نے شرکت کی۔
