اوول۔10 جون (سیاست ڈاٹ کام ) ورلڈ کپ 2019 میں ہندوستانی ٹیم کے کپتان ویراٹ کوہلی نے اسپورٹس مین اسپرٹ کی نئی مثال قائم کی اور اسمتھ سے خراب رویے پر شائقین پر برہمی کا اظہار کیا۔ اوول کے تاریخی میدان پر ہندوستان اور آسٹریلیا کے درمیان کھیلے گئے ورلڈ کپ میچ میں اسٹیڈیم ہندوستانی شائیقین سے کھچا کھچ بھرا ہوا تھا اور بمشکل آسٹریلیائی شائقین نظر آرہے تھے۔ ہندوستانی ٹیم کی بیٹنگ کے دوران جب سابق کپتان اسٹیون اسمتھ فیلڈنگ کے لیے باؤنڈری پرگئے تو ہندوستانی شائقین نے گزشتہ سال کے بال ٹیمپرنگ اسکینڈل کے حوالے سے ان پر فقرے کسے۔ اس موقع پر ہندوستانی ٹیم کے کپتان ویراٹ کوہلی نے مداخلت کی اور جملے کسنے پر شائقین کو انتباہ کرتے ہوئے کہا کہ وہ اسٹیون اسمتھ کے لیے تالیاں بجائیں۔ جب پانی کا وقفہ ہوا تو اسپورٹس مین اسپرٹ کا مظاہرہ کرنے اور حمایت کرنے پر اسمتھ نے کوہلی سے مصافحہ کرتے ہوئے ان کا شکریہ ادا کیا۔ جب میچ کے بعد کوہلی سے اس بارے میں سوال کیا گیا تو انہوں نے کہا کہ جو کچھ ہوگیا وہ ماضی کا حصہ بنا چکا ہے، اس واقعہ کو کافی عرصہ گزر چکا ہے اور اب وہ اپنی ٹیم کے لیے کھیل رہے ہیں اور انڈین پریمیئر لیگ (آئی پی ایل) بھی کھیل چکے ہیں۔ انہوں نے کہا کہ کسی بھی کھلاڑی کو اس طرح شرمندہ دیکھنا اچھا نہیں لگتا، ہمارے درمیان ماضی میں میدان میں چند لفظی تکرار ہوئیں لیکن ہمیں یہ اچھا نہیں لگتا کہ وہ کھلاڑی جب بھی میدان میں اترے تو اسے اس طرح کی چیزوں کا سامنا کرنا پڑے۔ کپتان نے کہا کہ اگر میں اسمتھ کی جگہ ہوتا اور میرے ساتھ کچھ ایسا (بال ٹیمپرنگ اسکینڈل) ہوا تھا تو اور میں اسے تسلیم کرکے، معافی مانگ کر واپس آتا لیکن پھر بھی اگر مجھ پر جملے کسے جاتے تو مجھے بھی اچھا نہیں لگتا اور یہی وجہ تھی کہ میں نے تماشائیوں کی طرف سے ان سے معذرت کی۔ کوہلی کے اس اقدام کو سوشل میڈیا پرسابق کرکٹرز نے بھی بہت سراہا۔
