جنیوا : 30 نومبر ( ایجنسیز ) فلسطینی عوام سے یکجہتی کیعالمی دن پر اقوام متحدہ کے سیکرٹری جنرل انتونیو گوتریس نے کہاکہ مقبوضہ فلسطینی علاقوں میں آج بھی اسرائیلی فوجی کارروائیاں جاری ہیں۔ان کا کہنا تھا کہ مغربی کنارے میں فلسطینیوں کا قتل عام، بار بار بے گھری اور انسانی امداد میں رکاوٹ ڈالنا ناقابلِ قبول ہے، تمام فریق حالیہ جنگ بندی کی مکمل پابندی کریں، انسانی امداد غزہ میں بڑے پیمانے پر داخل ہونے کی اجازت دی جائے۔انتونیو گوتریس کا کہنا تھا کہ فلسطینی سرزمین کے غیر قانونی قبضے کے خاتمے کا مطالبہ کرتا ہوں، دو ریاستی حل کی جانب ناقابل واپسی پیشرفت کا مطالبہ دہراتا ہوں۔دوسری جانب فلسطینیوں سے یکجہتی کے عالمی دن پر لندن میں ہزاروں افراد نے ریلی نکالی اور غزہ پر اسرائیلی جارحیت کے خلاف احتجاج کیا۔ مظاہرین نے ہائیڈ پارک سے وائٹ ہال تک مارچ کیا، مظاہرین نے اسرائیل مخالف اور فلسطینیوں کے حق میں نعرے لگائے۔ مظاہرین کی جانب سے حکومت سے اسرائیل کو اسلحہ فروخت روکنے کا مطالبہ کیا گیا، عالمی برادری سے غزہ میں امداد کی رسائی ممکن بنانے کا بھی مطالبہ کیا۔
