نئی دہلی۔15 مئی(سیاست ڈاٹ کام) انگلینڈ کرکٹ ٹیم کے سابق کپتان ناصر حسین کا خیال ہے کہ ہندوستانی ٹیم کے کپتان ویراٹ کوہلی اتنے باصلاحیت کھلاڑی ہیں کہ وہ کھیل کے مختلف فارمیٹس میں کپتانی بانٹنا پسند نہیں کریں گے ۔ناصر نے کرک بج پر ایک انٹرویو کے دوران کہا ہندوستان میں مختلف فارمیٹ کے لئے الگ کپتان ہونا ممکن نہیں ہے ۔ کوہلی باصلاحیت کھلاڑی ہیں اور ان کے لئے کھیل کے کسی بھی فارمیٹ میں کسی دوسرے کھلاڑی کے ساتھ کپتانی بانٹنا مشکل ہوگا اور وہ ایسا کرنا پسند نہیں کریں گے ۔کوہلی فی الحال تینوں فارمیٹ میں ہندوستانی ٹیم کے کپتان ہیں جس کی وجہ سے ان پرکبھی کبھی زیادہ دباؤآجاتا ہے۔ اسی دباؤ کے سلسلے میں ناصر نے کہا کہ انگلینڈ نے گزشتہ چند برسوں میں کپتانی بانٹنے کا طریقہ اختیارکیا ہے جس میں محدود اوور کے کپتان ایان مورگن ہیں اور ٹسٹ ٹیم کے کپتان جو روٹ ہیں۔کرکٹ میں کپتان بانٹنا کوئی برا خیال نہیں ہے ۔ انہوں نے کہاکوچ اس میں اہم کردار ادا کر سکتے ہیں اور ہم مختلف فارمیٹ کے لئے مختلف کوچ بھی مقررکرسکتے ہیں۔ انگلینڈ کے سابق کوچ ٹریور بیلس محدود اوور میں مؤثر دکھائی دیے لیکن اتنا اثر ٹسٹ کرکٹ میں نہیں دکھا سکے ۔ انہوں نے یہ بھی کہا کہ ہندوستانی ٹیم مینجمنٹ کھلاڑیوں کے انتخاب کے سلسلے میں بھی الجھا ہوا دکھائی دیتا ہے جیسا سال 2019 ورلڈ کپ میں نیوزی لینڈ کے خلاف سیمی فائنل میچ میں دیکھا گیا تھا۔ناصر نے ہندوستانی ٹیم میں نمبر چار پر بیٹنگ کے معاملے پر بھی کہا کہ بہت سے شاندار بیٹسمینس ہونے کے بعد بھی نمبر چارکھلاڑی کی تلاش پوری نہیں ہو سکی ہے ۔ انہوں نے کہا کہ ہندوستانی انتظامیہ میں ایک بات صحیح نہیں ہے وہ یہ کہ ہندوستان میں بہت سے باصلاحیت کھلاڑی ہیں اور دو مقابلوں میں ناکام ہونے کے بعد کسی اور کھلاڑی کو موقع دے دیا جاتا ہے اور پھر اس کے بعد کسی اور کوموقع ملتاہے۔
