کٹک۔22دسمبر (سیاست ڈاٹ کام) ویسٹ انڈیز کے نوجوان اوپنر شائي ہوپ ایک کیلنڈر سال میں سب سے زیادہ ون ڈے رنز بنانے کا اپنے ملک کے عظیم ترین بیٹسمین برائن کے 26 سال کی عمر کاریکارڈ توڑنے سے معمولی فرق سے چوک گئے ۔ لیکن انہوں نے سب سے تیز 3000 ون ڈے رنز مکمل کرنے کا اپنے ملک کے ویوین رچرڈز کا ریکارڈ توڑ دیا۔26 سالہ ہوپ ہندستان کے خلاف اتوار کو تیسرے اور آخری ون ڈے میں 42 رنز بنا کر آؤٹ ہو گئے اور لارا کا ریکارڈ توڑنے سے صرف پانچ رن سے چوک گئے ۔ ہوپ نے اس سال 28 میچوں میں 1345 رن بنائے جبکہ لارا نے 1993 میں 30 میچوں میں 1349 رن بنائے تھے ۔ہوپ 2019 میں ہندوستان کے روہت شرما کے بعد سب سے زیادہ رن بنانے والے دوسرے بیٹسمین ہیں۔ روہت اس سال 1400 سے زیادہ رنز بنا چکے ہیں۔ اوورآل ہوپ ایک کیلنڈر سال میں سب سے زیادہ رن بنانے میں 23 ویں نمبر پر آ چکے ہیں۔ ویسٹ انڈیز کے دوسرے بلے بازوں میں ڈیسمنڈ ہینز نے 1985 میں 1232 رنز، ویوین رچرڈز نے 1985 میں 1231 رنز اور کرس گیل نے 2006 میں 1217 رن بنائے تھے ۔ہوپ نے اپنی اننگز کا 35 واں رن بنانے کے ساتھ ساتھ ون ڈے میں 3000 رنز مکمل کر لئے اور ون ڈے میں سب سے تیز 3000 رن پورے کرنے والے کیریبین بیٹسمین بن گئے ۔ انہوں نے اس معاملے میں سب سے بڑا بیٹسمین رچرڈز کا ریکارڈ توڑ دیا۔ رچرڈز نے 69 اننگز میں 3000 رن پورے کئے تھے جبکہ ہوپ نے 67 اننگز میں 3000 رنز مکمل کر لئے ۔ اوورآل وہ سب سے تیز 3000 رن بنانے والے تیسرے بیٹسمین بن گئے ہیں۔
