بیروت13 جون (سیاست ڈاٹ کام) لبنان میں جاری ملک گیر مظاہروں میں 11 مظاہرین زخمی ہوگئے ہیں۔ ایل بی سی آئی مقامی ٹی وی نے یہ اطلاع دی۔ دو مظاہرین بیروت میں زخمی ہوئے جنہیں ریڈ کراس نے دواخانہ میں داخل کرایا، وہیں 9دیگر مظاہرین طرابلس میں جاری مظاہرے میں زخمی ہوئے اور انہیں لبنان کے ایک پرائیویٹ اسپتال میں داخل کرایا گیا ہے ۔ لبنان میں پیدا ہوئی بھیانک صورتحال کے خلاف جمعہ سے ملک گیر مظاہرے ہورہے ہیں۔ مظاہرین نے بیروت میں ایک مشہور دفتر کی عمات میں آگ لگادی اور اس عمارت کی دکانوں کو بھی نقصان پہنچایا۔ فساد پھیلانے والوں کو منتشر کرنے اور علاقے میں جائیداد کو برباد کرنے سے روکنے کی کوشش میں پولیس نے آنسو گیس کا استعمال کیا۔
