لبنان میں دوبارہ لاک ڈاؤن، نائٹ کلب اور پب بند

بیروت ۔ لبنان میں وزارت داخلہ نے کورونا وائرس کے مریضوں میں تیزی سے اضافے کے بعد 169 دیہات اورشہروں میں لاک ڈاؤن نافذ کردیا ہے ۔ ملک بھر میں تمام نائٹ کلبز اور پب بھی بند رکھنے کا حکم دیا گیا ہے۔ وزارت نے ایک بیان میں کہا کہ لاک ڈاؤن پیرکی صبح شروع ہو گیا اور19 اکتوبر تک جاری رہے گا۔ آئندہ نوٹس تک نائٹ کلب اور پب بند رہیں گے۔یاد رہے کہ وزارت داخلہ نے پھچلے ہفتے 111 دیہات میں لاک ڈاؤن کا حکم دیا تھا۔ اس کی مدت ختم ہونے کے بعد نیا حکم نامہ سامنے آیا ہے۔ اس میں نئے علاقوں کو بھی شامل کیا گیا ہے۔لبنان میں گذشتہ روز 1388 نئے افراد میں کورونا کی تصدیق ہوئی ہے۔ ملک میں کوروناسے متاثرہ افرادکی تعداد بڑھ کر52558 ہوگئی ہے۔وزارت صحت نے کہا ہے کہ گذشتہ 24 گھنٹوں کے دوران 5 مریض ہلاک ہوئے ہیں۔ اس طر ملک میں ہلاک شدگان کی تعداد 455 ہوگئی ہے۔ لبنان میں جولائی میں لاک ڈاؤن نرم ہونے کے بعد سے صرف بیروت کا انٹرنیشنل ایرپورٹ کھولاگیا ہے۔ اگست میں غیر معمولی طور پرکورونا معاملات کی تعداد میں اضافہ دیکھنے میں آیا تھا۔