ممبئی9ڈسمبر(سیاست ڈاٹ کام ) جنوبی ممبئی کے بریج کینڈی اسپتال میں تقریباً ایک ماہ زیر علاج رہنے کے بعد معروف گلوکارہ اور بلبل ہند بھارت رتن لتا منگیشکرکو اسپتال سے رخصت کردیا گیا۔اس موقع پر انہوں نے ایک ٹوئٹ کیا،جس کے جواب میں بزرگ اداکار اور شہنشاہ جذبات دلیپ کمار نے ٹوئٹ کے ذریعہ اظہار مسرت کیا ہے ۔دلیپ۔کمار نے اپنے ٹوئٹ میں کہاکہ “مجھے یہ خبر سن کر خوشی محسوس ہورہی ہے کہ ‘میری چھوٹی بہن لتا ‘اب ٹھیک ہے اور اسپتال سے گھر واپس لوٹ آئی ہے ۔برائے مہربانی اپنا خیال رکھیں۔واضح رہے کہ اتوار کی شام لتا نے اس کی اطلاع ایک ٹوئٹ کے ذریعہ دی اور کہاکہ وہ نمونیہ کا شکار ہوگئی تھیں ۔اسپتال میں ان کا علاج کرنے والے ڈاکٹروں کو لتا نے فرشتہ قرار دیا ہے ۔انہوں نے اپنے ٹویٹ میں مزیدکہا کہ 28 دن کے بعد گھر لوٹ رہی ہو ں،ڈاکٹر چاہتے تھے کہ میں مکمل طور پر صحت مند ہو جاؤں اور انہیں جب یہ محسوس ہوا کہ میں اب ٹھیک ہوں توانہوں نے مجھے گھر جانے کی اجازت دے دی ہے ،میں تمام پرستاروں اور عوام کا شکریہ ادا کرتی ہوں، جنہوں نے میری طبیعت ٹھیک ہو جانے کے لیے دعائیں کی ہیں۔