رکن کونسل کے کویتا کا سنگامترا پروگرام سے خطاب
حیدرآباد6فروری (یواین آئی) ٹی آر ایس رکن کونسل کے کویتا نے کہا کہ لڑکیوں کے خلاف ہونے والے تشدد کو کم کرنے کے لئے قوانین کا صحیح طور پر نفاذ کیا جانا چاہئے ۔انہوں نے رچہ کنڈہ پولیس کمشنریٹ کی جانب سے منعقدہ سنگامترا پروگرام سے خطاب کرتے ہوئے کہا کہ لڑکیوں اور خواتین سے چھیڑخانی کے واقعات کوروکنے کیلئے شی ٹیمیں ریاست کے تمام اضلاع میں سرگرم ہیں۔ وزیراعلی کے چندرشیکھرراو کی جانب سے تین سال پہلے شروع کردہ شی ٹیموں کی دیگر ریاستوں نے تقلید کی ہے ۔ تلنگانہ میں خواتین کو 33فیصد ریزرویشن دیاجارہا ہے ۔ تلنگانہ ایک ایسی ریاست ہے جو بچوں کا احترام کرتی ہے ،دنیا بھر میں، 40 فیصد خواتین، گھریلو تشدد کا شکار ہیں۔ اگر خواتین تلنگانہ میں خوش ہیں تو ریاست خوشحال ہوگی۔شی ٹیموں کے ساتھ سنگامتر قائم کرنا قابل تحسین ہے ۔سنگامتر کو تلنگانہ کے تمام اضلاع میں قائم کرنے کی وزیراعلی سے خواہش کی جائے گی۔سنگامترا پروگرام کا مقصد خواتین کے خلاف جرائم سے لڑنے کیلئے خواتین کو بااختیار بنانا اور اس تعلق سے بیداری پیداکرنا ہے ۔انہوں نے کہاکہ خواتین کو انسان کی طرح دیکھا جانا چاہئے ۔خواتین کو متحد ہوکر اپنی پریشانیوں کا مقابلہ کرنے کی ضرورت ہے ۔ خواتین پر رحم مادر سے ہی ان کے خلاف تشدد کا سلسلہ جاری رہتا ہے ۔