ممبئی۔ کانگریس کے سینئر لیڈر اور مہاراشٹر کے سابق وزیر بالاصاحب تھوراٹ نے اتوارکو اسپیکر کے انتخاب کے بعد گورنر بھگت سنگھ کوشیاری پر تنقید کرتے ہوئے کہا کہ وہ طویل عرصے سے اس کا مطالبہ کر رہے تھے، لیکن ایسا لگتا ہے کہ گورنرڈیڑھ سال سے سو رہے تھے۔ بھارتیہ جنتا پارٹی (بی جے پی) کے رہنما راہول نارویکر اتوار کو مہاراشٹر قانون ساز اسمبلی کے اسپیکر منتخب ہوئے۔ انہوں نے ادھو ٹھاکرے کی قیادت والی شیوسینا کے امیدوار راجن سالوی کو شکست دی۔صدر کا عہدہ گزشتہ سال فروری سے کانگریس کے نانا پٹولے کے استعفیٰ کے بعد خالی تھا۔اس سال کے شروع میں ریاست میں اس وقت کی حکمران مہا وکاس اگھاڑی (ایم وی اے ) کے رہنماؤں نے کوشیاری پر زور دیا تھا کہ وہ بجٹ اجلاس (مارچ میں) کے دوران اسپیکر کے انتخاب کے لیے شیڈول کو صاف کریں۔اتوار کو 288 رکنی ایوان کا دو روزہ خصوصی اجلاس ودھان بھون میں شروع ہوا جہاں نارویکر کو اسپیکر منتخب کیا گیا۔نارویکر کو مبارکباد دیتے ہوئے تھوراٹ نے ایک بیان میں کہا اسپیکر کا انتخاب شفاف طریقے سے ہوا ہے۔ ہم ایک عرصے سے گورنر سے یہی مطالبہ کر رہے ہیں۔ لگتا ہے گورنر ڈیڑھ سال سے سو رہے تھے ۔تھوراٹ نے کہا کہ جب مہاراشٹرا میں ایم وی اے اتحاد کی حکومت تھی، وہ لوک سبھا کی طرز پر اسپیکر کی تقرر چاہتے تھے لیکن اس کام کو پورا نہیں کیا گیا اور اب وہی کام انجام دیا گیا ہے۔
