فوری کارروائی نہ کرنے پر عدالت سے رجوع ہونے کا انتباہ، فورم فار گڈ گورننس کا چیف سکریٹری کو مکتوب
حیدرآباد۔15جولائی (سیاست نیوز) فورم فار گوڈ گورننس نے چیف سیکریٹری حکومت تلنگانہ محترمہ شانتی کماری کو روانہ کردہ مکتوب میں حکومت کی جانب سے مؤظف آئی اے ایس اورآئی پی ایس عہدیداروں کو ریاستی حکومت کے مشیر بنائے جانے اور انہیں کابینی درجہ دیئے جانے کو غیر قانونی قرار دیتے ہوئے مکتوب روانہ کیا اور ان سے خواہش کی کہ اس سلسلہ میں وہ فوری طور پر کاروائی کرتے ہوئے ان عہدیداروں کے خلاف شکایات کا جائزہ لیں۔ مسٹر ایم پدمنابھا ریڈی نے فورم فار گوڈ گورننس نے مکتوب میں ریاستی حکومت کے مشیر کے عہدہ پر فائز کئے گئے عہدیداروں کی تفصیل اور گذشتہ 9 برسوں کے دوران کئے گئے تقررات کے علاوہ ان کی معیاد میں توسیع کے احکامات کا ریکارڈ پیش کرتے ہوئے کہا کہ حکومت کی جانب سے عہدیداروں کو ان کی خدمات کے خاتمہ کے بعد بطور تحفہ ان عہدوں کی حوالگی عمل میں لائی جا رہی ہے تاکہ ان کے خلاف موجود شکایات پر کسی قسم کی کوئی کاروائی نہ ہو سکے۔ فورم نے سابق چیف سیکریٹری مسٹر سومیش کمار‘ سابق ڈائریکٹر جنرل آف پولیس مسٹر انوراگ شرما‘ سابق آئی اے ایس عہدیداروں ‘ سابق آئی پی ایس عہدیدار جناب عبدالقیوم خان کے علاوہ دیگر کو حکومت کے مشیر کے عہدہ پر تقرر کے علاوہ انہیں کابینی درجہ فراہم کرنے اور سہولتوں کی فراہمی کا تذکرہ کرتے ہوئے اس پر فوری کاروائی کرنے کی خواہش کی ۔ فورم فار گوڈ گورننس نے چیف سیکریٹری کی جانب سے عدم کاروائی کی صورت میں اس معاملہ میں عدالت میں درخواست مفاد عامہ کی درخواست داخل کرنے کی منصوبہ بندی کی ہے اور اسی لئے چیف سیکریٹری محترمہ شانتی کماری کو مکتوب نمائندگی روانہ کرتے ہوئے ان سے کاروائی کی خواہش کی گئی ہے اور ان کی جانب سے عدم کاروائی کی صورت میں عدالت سے رجوع ہوتے ہوئے مشیران حکومت کے خلاف احکام حاصل کئے جائیں گے۔ فورم فار گوڈ گورننس کے ذمہ داروں نے بتایا کہ ریاستی حکومت کی جانب سے جو طریقہ کار اختیار کیا گیا ہے اس کو دیکھتے ہوئے ایسا محسوس ہورہا ہے کہ حکومت برسرخدمت عہدیداروں کو اپنا ہمنوا بنانے اور انہیں اسی طرح کے انعامات کا لالچ دیتے ہوئے مرضی کے مطابق کام کرنے کی ترغیب دینے کے لئے اس طرح کے عہدہ تیار کرتے ہوئے ان پر تقررات عمل میں لائے جارہے ہیں۔م