نظام آباد ۔22 نومبر ۔ ( سیاست ڈسٹرکٹ نیوز )جماعت اسلامی ہند نظام آباد نے ملک، ملت اور ریاست و شہر نظام آباد کے مفاد اور ترقی کو پیش نظر رکھتے ہوئے اپنی تائید کا اعلان کانگریسی امیدوار محمد علی شبیر کے حق میں کیا ہے۔ آپ اور عملی میدان میں اپنی بس بھر قوت کو تائیدی امیدوار کے حق میں استعمال کرنے اور رائے عامہ (بشمول ملت اسلامیہ و برادران وطن) کو ہموار کرنے کا بھی فیصلہ کیا ہے۔ واضح رہے کہ ما قبل ملت اسلامیہ کے غیر سیاسی وابستگی لیکن سیاسی ملی شعور اور ہمدردی و تڑپ رکھنے والے افراد پر مشتمل ایک فورم کی تشکیل دیا گیا۔ نیز اجلاس کے انعقاد کے بعد ملت میں سیاسی شعوری بیداری ووٹ کے استعمال کی اہمیت نیز بھر پور رائے دہی پر کام شروع کیا ہے۔ کانگریسی امیدوار نے جماعت اسلامی کے اجلاس منعقدہ مسجد رضا بیگ پر جماعت اسلامی کی تائید پر شکریہ ادا کیا اور جماعت کی جانب سے پیش کیے گئے منشور کی عمل آوری کا تیقن بھی دیا۔ جماعت کے کیڈر کے علاوہ فورم کے افراد نے کثیر تعداد میں اجلاس میں شرکت کی۔
