وادی قناۃ منصوبے کو جلد مکمل کرنے کا فیصلہ
مدینہ۔گورنر مدینہ منورہ شہزادہ فیصل بن سلمان نے وادی قناۃ منصوبے کا دورہ کرکے اسے جلد از جلد مکمل کرنے کی ہدایت کی ہے۔انہوں نے کہاکہ وادی قناۃ منصوبے سے مدینہ منورہ میں قدرتی اور تعمیراتی ماحول میں توازن پیدا ہوگا۔سعودی خبررساں ادارے کے مطابق مدینہ منورہ میونسپلٹی وادی قناۃ منصوبہ 16کلو میٹر کے دائرے میں نافذ کرا رہی ہے۔گورنر مدینہ منورہ نے کہا ہے کہ یہ کثیر المقاصد منصوبہ ہے۔ اس کی بدولت بارش اور سیلاب کا پانی وادی کے ذریعے استعمال کیا جائے گا۔ وادی کے اطراف خودروجنگل کوپارک میں تبدیل کیا جائے گا۔منصوبے کا پہلا مرحلہ ڈیڑھ برس میں مکمل ہوگا۔ اس کے تحت 70 ہزار مربع میٹر کے رقبے پر پارک بنایا جائے گا جو وادی کے کنارے واقع ہوگا۔ یہاں تفریح کے لیے آنے والوں کے لیے میزیں لگائی جائیں گی۔ چہل قدمی کرنے والوں کے لیے راہداریاں ہوں گی جبکہ موٹر سائیکل سواروں کے لیے باقاعدہ ٹریک ہوگا۔وادی ( دریا) کو مزید گہرا اور کشادہ کیا جائے گا تاکہ بارش کازیادہ سے زیادہ پانی اس میں کھپایا جاسکے۔وادی میں جگہ جگہ قدرتی مناظر کے نمائندہ مراکز قائم کیے جائیں گے تاکہ مدینہ منورہ کے شہری اور زائرین وہاں خوشگوار اور صاف ستھری ہوا کا لطف اٹھاسکیں۔