ریاض۔ 14 مئی (سیاست ڈاٹ کام) حرمین شریفین کی جنرل پریذیڈنسی نے مسجد الحرام کی تیسری توسیع کے منصوبے پر کام دوبارہ شروع کرنے کی اجازت دے دی۔مسجد نبوی کی جنرل پریڈیذنسی کے پروجیکٹ اینڈ انجینئرنگ شعبے کی جانب سے مسجد الحرام کی تیسری توسیع کے باقی کاموں کو مکمل کرنے کا لائسنس جاری کر دیا گیا ہے۔پروجیکٹ اینڈ انجینئرنگ شعبے کی جانب سے بتایا گیا کہ دوبارہ شروع ہونے والے کاموں میں چھتوں کی آرائش کیلئے ماربل کی تنصیب، صحن میں موجود محرابوں کی آرائش مرکزی دروازے کی تکمیل اور دیگر اہم امور شامل ہیں۔مسجد الحرام میں نمازیوں کی کم تعداد کو مدنظر رکھتے ہوئے متعلقہ حکام کی جانب سے ہم آہنگی اور کوششوں کے بعد باقی کاموں کے منصوبے کی تکمیل کے لیے عملدرآمد پر تبادلہ خیال کیا گیا جو پہلے روک دیے گئے تھے۔رپورٹ میں بتایا گیا کہ خادم حرمین شریفین شاہ سلمان بن عبدالعزیز کی خواہش ہے کہ زائرین حرم کو ہر طرح کی راحت اور آرام کا ماحول فراہم کیا جائے۔جس کے لیے مجوزہ محکموں کی جانب سے مکمل تعاون کے ساتھ حرمین شریفین کے متعلقہ منصوبوں کی تکمیل اور کورونا وائرس سے بچاؤ اور دیگر حفاظتی اقدامات کیے جا رہے ہیں۔
