مدینہ منورہ ۔ مسجد نبویﷺ انتظامیہ کے ترجمان جمعان العسیری نے کہا ہے کہ زائروں‘ ایپ آئندہ چند دنوں کے دوران اسمارٹ فونز پر مہیا ہوگی۔ العیسری نے کہا کہ زائروں ایپ کا ترجمہ مختلف زبانوں میں ہوگا۔ اس ایپ کے ذریعے زائرین مسجد نبویﷺ آسانی سے آجاسکیں گے۔ وہاں عبادت اور زیارت کے مجاز ہوں گے۔ انہوں نے کہا کہ زائروں ایپ الحرمین ایک سے ماخوذ ہے اور یہ خاص طور پر مسجد نبوی ﷺکے زائرین کیلئے ہے۔ اس کی بدولت مسجد نبویﷺ کی زیارت کا طریقہ کار معلوم ہوگا۔زائرین یہ معلوم کرسکیں گے کہ کس دروازے سے مسجد نبویﷺ میں زائر داخل ہوں گے۔ کس دروازے سے نکلیں گے اور مسجد نبوی ﷺ میں کیا کام انجام دے سکیں گے۔ترجمان نے مزید کہا کہ ان سارے سوالات کی وضاحتیں ایپ میں مہیا ہوں گی۔ یاد رہے کہ مسجد نبوی ﷺ انتظامیہ نے روضہ اطہر میں نماز اور سلام پیش کرنے کے اجازت ناموں کے اجرا کے ساتھ زائرین کے استقبال کے لیے جامع منصوبہ بندی تیارکر رکھی ہے۔زائرین کی خدمت کے لئے 1700 مرد وخواتین عہدیدار کے علاوہ 4 ہزار کارکن تعینات کیے گئے ہیں۔عمرہ کی بحالی کے ساتھ مسجد نبوی ﷺ میں نماز،دیگر عبادات کے علاوہ سلام و درود کی اجازت فراہم کی گئی ہے لیکن یہ اجازت مشروط ہے ۔مسجد نبویﷺ میں عبادات کیلئے اعتمرنا ایپ کے ذریعہ اجازت نامہ حاصل کرناہے اور مقررہ وقت میں عبادات مکمل کرنا ہے۔
