ممبئی : ملک کے حالات انتہائی خراب ہیں ایسے میں مسلمانوں کو اپنے دستاویزات اور سرکاری دستاویزات کی تصحیح انتہائی ضروری ہے۔اس کے علاوہ مسلمان اپنا نام ووٹر لسٹ میں اندراج کروائیں اور یہ یقینی بنائیں کہ ان کا نام ووٹر لسٹ میں شامل ہے یا نہیں کیونکہ اگر آپ نے ایک مرتبہ ووٹ دیاہے تو اس کے باوجود آپ کے نام ووٹر لسٹ سے حذف ہوسکتے ہیں اس لئے اپنے ناموں کے اندراج اور اس کی جانچ ضروری ہے۔ ان خیالات کا اظہار کلکر سماج کے یوم تاسیس پر رکن اسمبلی اور ایس پی رہنما ابوعاصم اعظمی نے کیا۔انہوں نے کہا کہ ملک میں اب کوئی پارٹی ایسی نہیں ہے جو مسلمانوں کو ساتھ لینے کو تیار ہے۔ پارٹی کے اسٹیج پر مسلمانوں کو بلانا بھی انہیں گوارا نہیں ہے کیونکہ مسلمانوں کے ان کے ساتھ آنے سے غیر مسلم ان سے دور ہوسکتے ہیں لیکن ہر پارٹی کو مسلمانوں کے ووٹ ضرور چاہئے۔انہو ں نے کہا کہ جس طرح سے ماحول تیار کیا گیا ہے اس سے اچھے اور سیکولر ہندو بھی مسلمان سے دور ہو رہے ہیں۔انہوں نے کہا کہ نفرت کے سبب ملک میں مسلمانوں اور اقلیتوں کیلئے عرصہ حیات تنگ ہے لیکن مسلمانوں کو حکمت عملی کے ساتھ کام کرنے کی ضرورت ہے۔ دستور کی بقاء کیلئے اور جمہوری اقدار کیلئے ہر مسلمان کو ووٹ دینا لازمی ہے اور ایسے امیدوار کو ووٹ دینا ضروری ہے جو سیکولر ہو اور ذات پات اور دھرم کے نام پر فساد برپانہیں کرتا۔