معاملہ کی سی بی آئی اور ای ڈی کے ذریعہ تحقیقات ہو :سنجے راوت
ممبئی : شیوسینا کے رہنما سنجے راوت نے جمعہ کے روز کہا کہ ایودھیا میں رام مندر ٹرسٹ کے ذریعہ اراضی کی خریداری میں مبینہ مالی بے ضابطگی اور نام نہاد گھوٹالوں کی تحقیقات (سی بی آئی) اور ای ڈی کے ذریعہ ہونی چاہیے۔ انہوں نے کہا کہ بی جے پی کی قومی ایگزیکٹو کو ان ایجنسیوں سے اراضی کی خریداری کے معاملہ میں بے ضابطگی اور گھوٹالوں کی تحقیقات کے مطالبات پر مبنی ایک قرارداد پاس کرنا چاہئے۔انہوں نے یہ بات منی لانڈرنگ کی تفتیش کیلئے ممبئی اور ناگپور میں سابق ریاستی وزیر داخلہ انیل دیش مکھ کے ٹھکانوں پرچھاپہ ماری کے سوال کے جواب میں کہی۔ نائب وزیر اعلیٰ اجیت پوار اور شیوسینا نے وزیر انیل پرب کے خلاف سی بی آئی اور ای ڈی کے جانچ کے مطالبہ پر مبنی منظور کئے گئے قرارداد پر بی جے پی کی مہاراشٹرا یونٹ پر نشانہ لگاتے ہوئے راوت نے کہا کہ سی بی آئی اور ای ڈی بی جے پی کے کارکن ہیں،یا بی جے پی کے آئی ٹی سیل کے ممبر ہیں؟راجیہ سبھا ممبر نے الزام لگایا کہ بی جے پی نے اپنے سیاسی مخالفین کو نشانہ بنانے کے لئے سی بی آئی اور ای ڈی کا استعمال کرکے اس کی اہمیت کوکم کرنے کی کوشش کر رہی ہے۔ راوت نے کہا کہ مرکزی تفتیشی ایجنسیوں کا غلط استعمال صحیح نہیں ہے، اسے روکا جانا چاہئے۔ اگر تفتیشی ایجنسیاں قومی سلامتی ، قومی خزانے کو پہنچنے والے نقصان ، منی لانڈرنگ وغیرہ کے معاملات کی تحقیقات کرتی ہیں، تو یہ بات قابل فہم ہے، لیکن آپ ان ایجنسیوں کی شبیہ کیوں خراب کررہے ہیں۔خیال رہے کہ ادھو ٹھاکرے کی زیرقیادت مہا وکاس اگھاڑی حکومت رواں سال اپنے دو سال مکمل کرے گی۔
