امپھال : منی پور میں جاری تشدد کو دو سال مکمل ہو چکے مگر ریاست آج بھی بے یقینی کے اندھیرے میں ڈوبی نظر آتی ہے۔ خیال رہے کہ منی پور میں تشدد کی شروعات 3 مئی 2023 کو شروع ہوئی تھی اور اس کی برسی کے موقع پر جہاں کوکی۔زومی گروہ ریاست میں سیپریشن ڈے یعنی یومِ علیحدگی کا اہتمام کر رہا ہے، وہیں میتئی گروپ کی تنظیم رابطہ کمیٹی برائے اتحاد منی پور (کوکومی) امپھال میں ایک بڑے عوامی اجتماع کے ذریعہ مرکز سے اپنی اجتماعی تشویشات کے اظہار کا ارادہ رکھتی ہے۔ رپورٹ کے مطابق، تشدد کی اس دو سالہ مدت میں اب تک 250 سے زیادہ افراد ہلاک اور ہزاروں بے گھر ہو چکے ہیں۔ نسلی خطوط پر بٹی ہوئی اس ریاست میں تشدد رکنے کے باوجود خوف اور بے یقینی کی فضا اب بھی باقی ہے۔ آخری بار دونوں کمیونٹی کے درمیان شدید جھڑپیں نومبر 2024 میں ہوئی تھیں، جب کہ فروری 2025 میں وزیر اعلیٰ این بیرین سنگھ کے استعفے اور صدر راج کے نفاذ کو ایک اہم سیاسی موڑ سمجھا گیا۔ تاہم زمینی سطح پر ’معمول‘ کی واپسی ابھی بہت دور ہے۔ انڈین ایکسپریس کی رپورٹ کے مطابق، کانگ پوکپی ضلع کے ایک ریلیف کیمپ میں رہنے والی 55 سالہ کمواہ نے بتایا، ’’ہمیں دو ہفتہ میں ایک بار راشن ملتا ہے اور دو سال میں صرف تین مرتبہ فی فرد ایک ہزار روپے دیے گئے۔ گھر، ذریعہ معاش اور مستقبل، سب کچھ چھن چکا ہے۔‘‘
