نئی دہلی: سابق کانگریس صدر راہول گاندھی نے وزیر اعظم نریندر مودی کو ہدف تنقید بناتے ہوئے کہا ہے کہ ان کی قیادت والی حکومت کسی کی نہیں سن رہی ہے اور وہ من مانی کرکے انسانیت کے خلاف جرم کر رہی ہے۔ راہول گاندھی نے جمعرات کو ٹوئٹ کیا ’’مودی حکومت غریبوں کے بنیادی حقوق چھین رہی ہے۔ یہ انسانیت کے خلاف جرم ہے۔ ملک کے بہتر مستقبل کے لئے ہمیں ہر طبقے کے حقوق کا احترام کرنا ہوگا‘‘۔ راہول گاندھی نے اپنے ٹوئٹ کے ساتھ ہیومن رائٹس ڈے (یومِ انسانی حقوق) ہیش ٹیگ کا بھی استعمال کیا ہے۔راہول گاندھی نے اس ٹوئٹ کے ساتھ ایک خبر کا اسکرین شارٹ بھی شیئر کیا ہے جس کے مطابق لاک ڈاؤن کے دوران ملک کی آبادی کے ایک بڑے حصہ کو اپنا پیٹ بھرنے کیلئے قرض لینے پر مجبور ہونا پڑا۔ رپورٹ میں ایک سروے کا حوالہ دیتے ہوئے کہا گیا ہے کہ لاک ڈان کا سب سے زیادہ اثر مسلم اور دلت آبادی پر پڑا۔ اس رپورٹ میں مرکزی حکومت کے نئے زرعی قوانین پر بھی تبصرہ کرتے ہوئے کہا گیا ہے کہ اس سے خریداری کے پورے نظام پر اثر پڑے گا اور ملک کے بھوک کے حالات مزید ابتر ہوں گے۔کانگریس مواصلات کے محکمہ کے سربراہ رندیپ سنگھ سرجے والا نے بھی حکومت پر کسانوں کی بات نہ سننے کا الزام لگاتے ہوئے کہا کہ وہ تحریک چلانے والے کسانوں کو نظرانداز کر رہی ہے۔ انہوں نے کہا ’’تاریخ میں یہ بھی درج ہوگا کہ جب اناج پیدا کرنے والے کسان 16 دنوں سے سڑکوں پر حقوق کی جنگ لڑ رہے تھے، تب آپ سنٹرل وسٹا کے نام پر اپنے لئے ایک محل کھڑا کر رہے تھے۔ جمہوریت میں اقتدار،جنون پورا کرنا نہیں، عوامی خدمت اور عوامی فلاح و بہبود کیلئے کام کرنے کا ایک ذریعہ ہوتا ہے‘‘۔
