نئی دہلی : کانگریس نے کہا ہے کہ وزیراعظم نریندر مودی گجرات اسمبلی انتخابات جیتنے کے لئے ہر بار اسی طرح کی منصوبہ بندی کرتے ہیں اور اس بار بھی وہ گجرات میں کانگریس لیڈر احمد پٹیل مرحوم کا نام لے کر سیاسی انتشار کی کوشش کررہے ہیں۔ کانگریس کے ترجمان پون کھیرا نے ہفتہ کو یہاں ایک پریس کانفرنس میں کہا کہ گجرات فسادات کے لیے تشکیل دی گئی خصوصی تفتیشی ٹیم نے احمد پٹیل کا نام لے کر کانگریس کو بدنام کرنے کی کوشش کی ہے ۔ احمد پٹیل ہوں یا سونیا گاندھی ،یہ سب بہانہ ہے ، اصل نشانہ گجرات کا الیکشن ہے ۔
انہوں نے کہا کہ وزیر اعظم مودی گجرات میں انتخابات جیتنے کے لیے طویل عرصے تک اسی طرز پر کام کرتے ہیں۔ انتخابات سے عین قبل وہ اقلیتوں کا نام لے کر عوام کے جذبات بھڑکانے کا کام کرتے ہیں اور اب اسمبلی انتخابات قریب ہیں تو انہوں نے گجرات فسادات کی ذمہ داری سے خود کو بری الذمہ قرار دیتے ہوئے آنجہانی کانگریس لیڈر احمد پٹیل کو نشانہ بنایا ہے اور کہا کہ حکومت کے اشارے پر کام کرنے والی خصوصی تحقیقاتی ٹیم نے مسٹر پٹیل کا نام لے کر سیاسی فائدہ حاصل کرنے کی کوشش کی ہے ۔انہوں نے کہا کہ مسٹر مودی کی طرف سے انتخابات جیتنے کی جو سازش رچی جا رہی ہے اس میں کوئی تبدیلی نہیں آئی ہے ۔ پہلے وہ کہتے تھے کہ ان کے خلاف پڑوسی ممالک سے سازش ہو رہی ہے اور اب وہ ملک کے وزیر اعظم ہیں تو بین الاقوامی سطح پر سازش کی بات کرتے ہیں۔ انہوں نے اس سے قبل کانگریس حتیٰ کہ سابق وزیر اعظم منموہن سنگھ اور سابق آرمی چیف دیپک کپور پر بھی ان کے خلاف سازش کرنے کا الزام لگایا تھا جس کے لیے انہیں ڈاکٹر سنگھ سے معافی مانگنی پڑی تھی۔
