سنچورین ۔17 فروری (سیاست ڈاٹ کام) انگلینڈ نے جنوبی افریقہ کو سیریز کے آخری اور تیسرے ٹوئنٹی20 میں باآسانی 5 وکٹوں سے شکست دے کر 2-1 سے سیریز جیت لی۔ سنچورین میں کھیلے گئے فیصلہ کن میچ میں میزبان جنوبی افریقہ کے کپتان ڈی کاک نے ٹاس جیت کر پہلے خود بیٹنگ کا فیصلہ کیا تو بیٹسمینوں نے بہترین کارکردگی کا مظاہرہ کیا لیکن ٹیم کو ناقابل تسخیر ہدف دینے میں ناکام ہوئے۔ کپتان کوئنٹن ڈی کوک اور ٹیمبا باووما نے پہلی وکٹ پر 84 رنز بنائے ۔ ڈی کوک 35 جبکہ باووما صرف ایک رنز کے فرق سے نصف سنچری مکمل نہ کرپائے جس کے بعد ڈوسن نے 11 رنز کی اننگز کھیلی۔ جنوبی افریقہ کے کلاسان نے 33 گیندوں پر 66 اور ڈیوڈ ملر نے 20 گیندوں پر 35 رنز بنا کر ٹیم کو بڑا مجموعہ ترتیب دینے میں اہم کردار ادا کیا تاہم پریٹوریس 11 اور فیلکوایو صرف ایک رن بنا کر پویلین لوٹ گئے۔مقررہ 20 اوورز میں جنوبی افریقہ نے 6 وکٹوں پر 222 رنز بنا کر انگلینڈ کو مشکل ہدف ضرور دیا لیکن بولرز اس کا دفاع کرنے میں ناکام رہے۔ انگلینڈ کی جانب سے کیوران اور اسٹوکس نے فی کس2 وکٹیں حاصل کیں۔ ہدف کے تعاقب میں انگلینڈ کو پہلا دھکا 15 رنز پر ہی لگا جب جیسن روئے صرف 7 رنز بنا کر آوٹ ہوئے جس کے بعد دوسری وکٹ کی شراکت میں جاز بٹلر اور جونی بیئراسٹو نے ٹیم کے اسکورکو 106 رنز تک پہنچایا۔بٹلر 57 رنز بنا کر آوٹ ہوئے، بیئراسٹو 140 کے اسکور پر 64 رنز بناکر فیلکوایو کی گیند پر آوٹ ہوئے تو اننگز کا 13 واں اوور جاری تھا اور جنوبی افریقہ نے ڈیوڈ ملان کو 145 پر پویلین بھیج کر مہمان ٹیم کے لئے ایک اور مشکل کھڑی کردی۔ کپتان ایان مورگن نے بین اسٹوکس کے ساتھ پانچویں وکٹ میں ٹیم کو جیت کے قریب لاکھڑا کیا لیکن اسٹوکس کی اننگز 206 کے مجموعی اسکور پر 22 رنز پر تمام ہوئی لیکن کپتان نے ہمت نہیں ہاری۔ انگلینڈ نے کپتان مورگن کی ناقابل شکست 22 گیندوں پر57 رنز کی اننگز کی بدولت 20 ویں اوورکی پہلی گیند پر 226 رنز بنا کر مطلوبہ ہدف حاصل کرکے میچ 5 وکٹوں سے جیت لیا۔ انگلینڈ نے میچ کے ساتھ ساتھ ٹی ٹوئنٹی سیریز بھی 2-1 سے جیت لی۔ مورگن کو میچ اور سیریزکا بہترین کھلاڑی قرار دیا گیا۔دورہ افریقہ پر انگلینڈ کی یہ ٹسٹ سیریز میں کامیابی کے بعد دوسری سیریز کامیابی ہے۔