بھوپال : راشٹریہ سویم سیوک سنگھ کے سربراہ موہن بھاگوت آج یہاں سندھو سماگم سے خطاب کیا۔ اس تقریب میں مدھیہ پردیش کے وزیر اعلی شیوراج سنگھ چوہان بھی موجود تھے۔بھارتیہ سندھو سبھا کی جانب سے یہاں بھیل دسہرہ میدان میں سندھو سماگم کا انعقاد کیا گیا تھا ، جس میں اس برادری سے جڑے اورریاست کے ہزاروں کارکنان نے شرکت کی ۔اس پروگرام کے کوآرڈینیٹر اوربھارتیہ جنتا پارٹی (بی جے پی) کے ریاستی جنرل سکریٹری بھگوان داس سبنانی نے بتایاکہ اس پروگرام میں ملک کے مختلف حصوں سے ہزاروں مرد و خواتین نے حصہ لیا۔وزیر اعظم نریندر مودی بھی بھاگوت کے آج کے دورہ کے ایک دن بعد ہفتہ کو بھوپال پہنچیں گے ۔ اس کے علاوہ شہر میں اعلیٰ فوجی افسران کی تین روزہ کانفرنس بھی جاری ہے ۔ اس کے پیش نظر شہر میں سیکورٹی کے سخت انتظامات کئے گئے ہیں۔ پولیس انتظامیہ نے آج اور کل متعلقہ تقریب کے مقامات کے گرد روٹ کی تبدیلی کے حوالے سے ایڈوائزری جاری کی ہے ۔
