کئی جگہ ای وی ایم خرابی سے ووٹنگ متاثر ، ووٹروں کی طویل قطاریں
ممبئی۔ 2 ڈسمبر (یو این آئی) مہاراشٹر میں بلدیات اور نگر پنچایتوں کے عام انتخابات کے دوران آج صبح سے ہی 264 میونسپل کونسلوں اور نگر پنچایتوں میں ووٹنگ کا آغاز ہوا، لیکن ریاست کے کئی علاقوں میں ای وی ایم مشینوں میں تکنیکی خرابی کے باعث ووٹنگ کے عمل میں رکاوٹیں پیدا ہوئیں۔ بیشتر مقامات پر صبح ساڑھے سات بجے ووٹنگ شروع ہوتے ہی ووٹرز بڑی تعداد میں مراکز پر پہنچ گئے ، تاہم ای وی ایم کے بند پڑ جانے سے کئی بوتھوں پر ووٹرز کو شدید پریشانی کا سامنا کرنا پڑا۔ شولاپور ضلع کے موہول نگر پریشد کے نیتا جی پرشالا مرکز میں ووٹنگ کے آغاز کے فوراً بعد ہی ای وی ایم اچانک بند ہوگئی، جس کے نتیجے میں تقریباً آدھے گھنٹے تک پولنگ مکمل طور پر رک گئی۔ انتخابی عملے نے مشین کو چلانے کی کوششیں شروع کر دیں مگر انتظار میں کھڑے ووٹرز کی مشکلات بڑھتی گئیں۔ موہول کے اتھواڑی بازار مرکز پر بھی ای وی ایم میں خرابی پیش آئی، جس کے بعد سابق رکن اسمبلی رمیش کدم نے الزام لگایا کہ مشین پر صرف حکمراں جماعت کے نشان کا بٹن فعال ہو رہا ہے ۔ ان الزامات کو مسترد کرتے ہوئے امیدوار سشیل کشر ساگر نے کہا کہ اپوزیشن شکست دیکھ کر بے بنیاد دعوے کر رہی ہے ۔وارڈ نمبر دو کے بوتھ نمبر ایک پر ای وی ایم تقریباً ایک گھنٹے تک بند رہی۔
اور امیدواروں نے مرکز پر جاکر عہدیداروں سے تفصیلات طلب کیں۔
