بہار میں شراب کے نام پر زہر کا بیوپار ۔ سیوان ، سارن ، موتیہاری ، چھپرہ متاثرہ اضلاع
نئی دہلی‘ کانگریس صدر ملک ارجن کھرگے اور پارٹی کے سابق صدر راہول گاندھی نے سیوان میں زہریلی شراب سے کئی لوگوں کی موت کے سانحہ پر گہرے رنج و غم کا اظہار کرتے ہوئے آج کہا کہ بہار حکومت غیر قانونی شراب کے کاروبار کو روکنے میں ناکام رہی ہے ۔ اسی وجہ سے ریاست میں زہریلی شراب کے واقعات ہو رہے ہیں۔کھرگے نے کہا کہ بہار کے سیوان اور سارن کے 16 گاؤں میں زہریلی شراب پینے سے اب تک 36 لوگوں کی موت ہو چکی ہے ، جو بہت تکلیف دہ اور افسوسناک ہے ۔ متاثرین کے سوگوار خاندانوں سے ہماری گہری تعزیت۔ حکومت سے گزارش ہے کہ وہ اس بات کو یقینی بنائے کہ مجرموں کو سخت سے سخت سزا دی جائے ۔انہوں نے بہار حکومت پر غیر قانونی شراب کو روکنے میں ناکام ہونے کا الزام لگاتے ہوئے کہا کہ اس سے پہلے دوسرے اضلاع میں مسلسل غیر قانونی شراب کی وجہ سے بہت سے لوگ اپنی جانیں گنوا چکے ہیں، جس سے ظاہر ہوتا ہے کہ بہار حکومت شراب کے ناجائز کاروبار کو روکنے میں کس قدر ناکام ہے ۔بہار میں غیر قانونی شراب کی وجہ سے لوگوں کی اموات کے واقعات کی تفصیلات بتاتے ہوئے انہوں نے کہاکہ اس سے قبل اپریل 2023 میں موتیہاری میں نقلی شراب پینے سے 26 لوگوں کی موت ہوئی تھی۔ دسمبر 2022 میں چھپرہ میں 71 افراد اپنی جانوں سے ہاتھ دھو بیٹھے اور درجنوں دیگر اپنی آنکھوں کی بینائی سے محروم ہوگئے تھے ، جب کہ مارچ 2022 میں بانکا میں 12 افراد ہلاک ہوئے ۔ نومبر 2021 میں گوپال گنج، بیتیا اور مظفر پور میں زہریلی شراب پینے سے 43 لوگوں کی موت ہو گئی۔کھرگے نے کہا کہ یہ واقعات اس وقت ہو رہے ہیں جب سال 2017 میں وزیر اعلیٰ نتیش کمار نے کہا تھا کہ ‘جب تک میں زندہ ہوں بہار میں شراب نہیں بیچی جائے گی’۔ جب حکم امتناعی نافذ ہے ، پھر شراب کا غیر قانونی کاروبار کیوں جاری ہے ۔ بہار میں موقع پرست ڈبل انجن والی حکومت سینکڑوں لوگوں کی جان لینے کی ذمہ دار ہے ۔راہول گاندھی نے کہا کہ بہار میں زہریلی شراب پینے سے کئی لوگوں کی موت کی خبر انتہائی افسوسناک ہے ۔ تمام سوگوار خاندانوں سے میری گہری تعزیت ہے ۔ میں ان حادثات میں بیمار ہونے والوں کی جلد صحت یابی کی امید کرتا ہوں۔ پابندی کے باوجود بہار اس طرح کے واقعات کا شکار ہو رہا ہے کیونکہ جرائم پیشہ عناصر بے خوف ہو کر شراب کا غیر قانونی کاروبار چلا رہے ہیں۔ توقع ہے کہ حکومت ایسے سانحات اور جرائم کی روک تھام کے لیے سخت اقدامات کرے گی۔