دوحہ ، 17مئی (یو این آئی) ہندوستان کے اولمپک چمپئن نیرج چوپڑا نے جمعہ کی رات دوحہ ڈائمنڈ لیگ میں 90.23 میٹر شاندار تھرو کے ساتھ اپنے کیریئر میں پہلی بار 90میٹر کی حدکو عبور کیا، لیکن جرمنی کے جولین ویبر نے ڈرامائی انداز میں انہیں فتح سے محروم کر دیا، جنہوں نے آخری راؤنڈ میں 91.06 میٹر کی تھرو پھینک کر عالمی برتری حاصل کی۔ ٹوکیو 2020 کے طلائی تمغہ جیتنے والے اور موجودہ عالمی سلور میڈلسٹ نیرج نے تاریخی تھرو کے ساتھ شروعات میں ہی رفتار بنائی تھی، جس سے وہ 2019 میں شیوپال سنگھ کے 90.10 میٹر کے بعد یہ کامیابی حاصل کرنے والے دوسرے ہندوستانی اور تیسرے ایشیائی کھلاڑی بن گئے ۔ 26 سالہ کھلاڑی نے تھرو کے بعد فتح کی خوشی میں اپنے ہاتھ بلند کیے اور ایک بڑی ذاتی کامیابی کا جشن منایا۔2022 کے یورپی چمپئن ویبر نے اپنی بہترین کارکردگی آخری لمحات کے لیے بچا کر رکھی، چھٹے راؤنڈ میں ایک بڑا تھرو پھینک کر نیرج چوپڑا کے ریکارڈ کو پیچھے چھوڑ دیا اور سیزن کی اپنی پہلی ڈائمنڈ لیگ فتح درج کی۔ گریناڈا کے دو بار کے عالمی چمپئن اینڈرسن پیٹرز 85.34 میٹر کے ساتھ تیسرے نمبر پر رہے۔ کیلنڈر میں تیسرے نمبر کی اس2025 ڈائمنڈلیگ میں کئی عالمی سطح کے مظاہرے اور ٹریک اینڈ فیلڈ میں اولمپک ری میچ دیکھنے کو ملے ۔ جمائیکا کی ٹیا کلیٹن نے خواتین کی 100 میٹر میں 10.92 سکنڈ کے ساتھ عالمی برتری حاصل کی۔
