ٹوکیو، 12 جون (سیاست ڈاٹ کام) جاپان کے وزیر اعظم شنزو آبے ایران کے تین روزہ دورے کیلئے چہارشنبہ کوتہران کیلئے روانہ ہو گئے ۔ گزشتہ 40 برسوں کے دوران ایران کا دورہ کرنے والے مسٹر آبے پہلے جاپانی وزیر اعظم ہیں۔ اس سے پہلے سال 1978 میں اس وقت کے وزیر اعظم تاکیو فوکیدا نے ایران کا دورہ کیا تھا۔مقامی میڈیا رپورٹ کے مطابق مسٹر آبے اس دورہ کے دوران ایران کے صدر حسن روحانی اور سپریم مذہبی رہنما آیت اللہ علی خامنہ ای سے ملاقات کر کے مغربی ایشیا میں بڑھتی ہوئی کشیدگی کے علاوہ مختلف معاملات پر بات چیت کریں گے ۔این ایچ کے نیوز کے مطابق مسٹر آبے اور مسٹر روحانی ایران کے جزوی طور پر تاریخی نیوکلیئر معاہدے سے الگ ہونے پر خاص طور پر بات چیت کریں گے ۔مسٹر آبے مغربی ایشیا میں موجودہ کشیدگی کو کم کرنے کیلئے روحانی اور خامنہ ای سے کھلی بحث کرنا چاہتے ہیں۔مسٹر آبے کا گزشتہ سال ایران کا دورہ کرنے کا پروگرام تھا لیکن امریکہ کے نیوکلیئر معاہدے سے الگ ہونے کے بعد انہوں نے دورہ منسوخ کر دیا تھا۔واضح رہے کہ سال 2015 میں ایران نے امریکہ، چین، روس، جرمنی، فرانس اور برطانیہ کے ساتھ ایک معاہدے پر دستخط کئے تھے ۔ معاہدے کے تحت ایران نے اس پر عائد اقتصادی پابندیوں کو ہٹانے کے بدلے اپنے جوہری پروگرام کو محدود کرنے پر اتفاق کیا تھا۔