سمستی پور، 23 اکتوبر (یو این آئی) مرکزی وزیر تعلیم دھرمیندر پردھان نے اعلان کیا ہے کہ وزیر اعظم نریندر مودی بہار میں نیشنل ڈیموکریٹک الائنس (این ڈی اے ) کی انتخابی مہم کا آغاز 24 اکتوبر کو ضلع سمستی پور میں بھارت رتن کرپوری ٹھاکر کی جائے پیدائش سے کریں گے ۔ دھرمیندر پردھان سمستی پور کے دودھ پورہ ایئرپورٹ گراؤنڈ میں جمعہ کے روز ہونے والی وزیر اعظم کی عوامی ریالی کی تیاریوں کا جائزہ لینے سمستی پور پہنچے ۔ اس موقع پر صحافیوں سے بات کرتے ہوئے انہوں نے کہا کہ وزیر اعظم نریندر مودی کل جن نائک کرپوری ٹھاکر کی جائے پیدائش کرپوری گاؤں میں واقع اسمرتی بھون جائیں گے اور کرپوری ٹھاکر کے مجسمے کو خراج عقیدت پیش کرکے بہار میں این ڈی اے کی انتخابی مہم میں حصہ لینے کا آغاز کریں گے۔ انہوں نے کہا کہ بہار کے لوگوں نے ایک بار پھر ریاست میں این ڈی اے کو زبردست جیت دلانے کا ارادہ کر لیا ہے ۔ دھرمیندر پردھان نے کہا کہ ڈبل انجن والی حکومت کے دور میں بہار میں بڑے پیمانے پر ترقیاتی کام ہوئے ہیں۔ اس موقع پر مرکزی وزیر مملکت برائے داخلہ نتیانند رائے نے کہا کہ یہ بہار کے لوگوں کیلئے فخر کی بات ہے کہ وزیر اعظم نریندر مودی کرپوری ٹھاکر کی سرزمین پر آ رہے ہیں۔ رائے نے کہا کہ وزیر اعظم کی پہلی انتخابی ریلی میں بڑی بھیڑ شرکت کرے گی کیونکہ یہاں کے لوگ خود وزیر اعظم کی ریالی کی تیاری کر رہے ہیں۔ جے ڈی یو کے قومی کارگزار صدر سنجے جھا نے اس موقع پر کہا کہ وزیر اعظم نریندر مودی نے پہلے کرپوری ٹھاکر کو بھارت رتن دیا اور اب وزیر اعظم بہار میں اپنی انتخابی مہم ان کی جائے پیدائش کرپوری گاؤں سے شروع کریں گے ۔
یہ بہار کے لوگوں کے لیے فخر کی بات ہے ۔
