اسلام آباد: شمالی اور جنوبی وزیرستان میں سکیورٹی فورسز اور دہشت گردوں کے درمیان جھڑپوں میں 12 دہشت گرد ہلاک ہوگئے ۔پاک فوج کے شعبہ تعلقات عامہ کے مطابق دہشت گردوں سے چھڑپوں میں سکیورٹی فورسز کے6بہادر جوان شہید ہوئے ۔آئی ایس پی آر کے مطابق سکیورٹی فورسز اور دہشت گردوں کے درمیان جھڑپوں کے 2 واقعات ہوئے ، 19 ستمبر کو پاک افغان سرحد پر 7 دہشت گردوں کی نقل و حرکت دیکھی گئی جو پاکستان میں دراندازی کی کوشش کررہے تھے ۔سکیورٹی فورسز نے شمالی وزیرستان کے علاقے سپن وام میں ان دہشت گردوں کا پتا لگایا اور انہیں مؤثر انداز میں گھیر کر ساتوں دہشت گردوں کو ہلاک کردیا۔
آئی ایس پی آر کے مطابق دوسرا واقعہ جنوبی وزیرستان کے علاقے لدھا میں پیش آیا جہاں دہشت گردوں کے گروپ نے سکیورٹی فورسز کی چیک پوسٹ پر حملہ کیا۔آئی ایس پی آر کے مطابق سکیورٹی فورسز نے مقابلہ کرتے ہوئے 5 دہشت گردوں کو ہلاک کردیا جبکہ شدید فائرنگ کے تبادلے کے دوران 6 بہادر جوانوں نے جام شہادت نوش کیا۔
