مہلوکین میں10بچے‘17خواتین شامل‘بیشتر زخمیوںکی حالت نازک‘حادثہ کی تحقیقات کا حکم
چینائی۔27؍ستمبر ( ایجنسیز )ٹاملناڈو کے کرور میں تمل ویتری کجاتھم (TVK) کے سربراہ اور فلم اداکار وِجئے کی قیادت میں منعقدہ ریالی میں عوام کی بڑی تعداد نے شرکت کی تاہم اتنی بڑی تعداد میں لوگ جمع ہونے کی وجہ سے بھگڈر مچ گئی۔اس حادثے میں متعدد افراد بے ہوش ہو گئے جنہیں فوری طور پر ایمبولینس کے ذریعہ ہاسپٹل منتقل کیا گیا۔ اب تک موصولہ اطلاعات کے مطابق 38 افراد ہلاک ہو چکے ہیں جن میں 8 بچے اور16خواتین بھی شامل ہیں جبکہ درجنوں افراد بے ہوش ہو گئے۔ زخمیوں کو کرور کے ہاسپٹل منتقل کیا گیا جن میں کچھ کی حالت نازک بتائی جا رہی ہے۔ریالی کے دوران ہجوم کو منتشر کرنے کے لئے پولیس نے لاٹھی چارج کیا۔ کرور میں ٹی وی کے صدر کی کارنر میٹنگ کے لیے بڑی تعداد میں لوگ جمع ہو گئے تھے جس کے باعث وِجئے کی پرچار گاڑی آگے نہیں بڑھ سکی۔صورتحال قابو سے باہر ہوتی دیکھ کر وِجئے کو پولیس کی مدد طلب کرنی پڑی اور انہوں نے کچھ دیر کیلئے اپنی تقریر روک دی۔ بعد ازاں بھگڈر مچنے کی وجہ سے کچھ پارٹی کارکن بھی بے ہوش ہو گئے۔ دو ایمبولینسیں موقع پر پہنچیں اور بے ہوش افراد کو ہاسپٹل پہنچایا گیا۔ٹاملناڈو کے چیف منسٹر ایم کے اسٹالن نے کہا کہ وِجئے کی ریالی میں بھگڈر مچنے سے متعدد افراد ہاسپٹل پہنچے اورکرور انتظامیہ سے موصولہ معلومات تشویش ناک ہیں۔وزیر صحت سبرامانیان نے ضلع کلکٹر سے کہا کہ ہنگامی مدد فراہم کی جائے اور وزیر انبل مہیش کو بھی ضروری تعاون کی ہدایت دی گئی ہے۔ اسٹالن نے اعلیٰ عہدیداروں کو ہدایت دی کہ کرور میں معمول کی صورتحال بحال کرنے کے لئے فوری اقدامات کئے جائیں اور عوام سے اپیل کی کہ وہ طبی اور پولیس اہلکاروں سے تعاون کریں۔ادھر کرور کے ویلچامپیورم علاقے میں سیکیورٹی وجوہات کی بنا پر برقی کی سربراہی معطل کر دی گئی ہے۔ حکام کے مطابق نوجوان درختوں کی شاخوں پر بیٹھ رہے تھے اور چونکہ علاقہ میں برقی کی لائنیں ہیں اس لئے حفاظتی اقدامات کے طور پر یہ قدم اٹھایا گیا۔ وِجئے کے پرچار کے ختم ہونے تک اس علاقہ میں برقی کی فراہمی بحال نہیں کی جائے گی۔ چیف منسٹرایم کے اسٹالن نے وجے کی ریالی کے دوران کرور بھگدڑ کی تحقیقات کیلئے جسٹس ارونا جگدیسن کی سربراہی میں کمیشن آف انکوائری کا اعلان کیا ہے ۔ انہوں نے مہلوکین کے ورثاء کیلئے فی کس 10لاکھ روپئے اور شدید طور پر زحمیوں کیلئے ایک لاکھ رروپئے ایکس گریشیا کا اعلان بھی کیا۔TVK کے سربراہ وجے نے کرور بھگدڑ پر اپنی خاموشی توڑتے ہوئے کہا کہ اس حادثہ پر ان کا دل ٹوٹ گیا ہے اور وہ ناقابل برداشت، ناقابل بیان درد اور دکھ میں ہیں۔ اپنی جانیں گنوانے والوں کے خاندانوں کے تئیں اپنی گہری تعزیت کا اظہار کرتے ہوئے وجے نے زخمیوں اور ہاسپٹلس میں زیر علاج لوگوں کی جلد صحت یابی کیلئے بھی دعا کی۔اس سانحہ کے احتساب اور پولیس کی تیاری دونوں پر سوالات اٹھائے جارہے ہیں۔ کیا وجے کی آمد میں غیرمعمولی تاخیر اس حادثہ کی بڑی وجہ ہے اور کیا یہ جان بوجھ کر ایسا کیا گیا تاکہ اس کی بڑے پیمانے پر حمایت کا مظاہرہ کیا جاسکے؟ کیا اس سے پہلے کی ریلیوں کے پیش نظر ایسے حالات سے بچنے کے لیے مناسب اقدامات کیے گئے تھے؟ٹاملناڈو میں اسمبلی الیکشن کیلئے ابھی 6ماہ سے زیادہ کا وقت ہے اور وجئے نے اپنی عوامی حمایت کے مظاہرہ کیلئے ریالی کا اہتمام کیا ۔ریالی میں بھگدڑ نے ہونے والی ہلاکتوں پر وزیر اعظم نریندر مودی ‘ صدر کانگریس ملکارجن کھرگے‘ پرینکا گاندھی ‘ اکھلیش یادو اور دیگر قائدین نے گہرے دکھ کا اظہار کیا اور مہلوکین کے ورثاء سے اظہار تعزیت کیا۔پولیس نے اس حادثہ کے سلسلہ میں ایک مقدمہ درج کیا ہے۔