واشنگٹن ۔26 مئی ۔( سیاست ڈاٹ کام ) امریکہ کے صدر ڈونالڈٹرمپ نے عالمی وباکورونا وائرس سے بری طرح متاثر ملک کے حالات کے درمیان گولف کھیلنے کا دفاع کیا ہے ۔ ٹرمپ نے حال ہی میں ان کے گولف کھیلنے کے حوالہ سے میڈیا کوریج کے خلاف ٹوئٹ کرکے کہا ’’باہر نکلنے کے لئے یا تھوڑی سی ورزش کرنے کے لئے میں ہر ہفتے کے آخر میں گولف کھیلتا ہوں۔ فرضی اور بدعنوان نیوز نے اس کو ایسے دکھایا جس سے یہ گناہ کی طرح لگنے لگا ‘‘۔امریکہ کے متعدد بڑے اشاعتی گروپوں نے دراصل ملک میں کورونا وائرس سے ایک لاکھ لوگوں کی موت کے درمیان ٹرمپ کے ورجینیا میں گولف کھیلے جانے کے تعلق سے ان پرسخت تنقید کی تھی جس کے حوالہ سے انہوں نے یہ ٹوئٹ کیا ہے ۔صدر نے کہا کہ میڈیا نے یہ کیوں نہیں کہا کہ میں نے تین ماہ بعد پہلی بار گولف کھیل رہاہوں اور اگر میں نے تین سال بعد بھی گولف کھیلتا تب بھی وہ اسی طرح ہی کہتے۔ وہ نفرت انگیز اور منتشر الذہن ہوچکے ہیں‘‘ ۔اس سے پہلے ٹرمپ نے آئندہ صدارتی انتخابات میں ان کے ڈیموکریٹک حریف جو بائیڈن کے کام کے تئیں اخلاقیات کا حوالہ دیتے ہوئے ان پر تنقید کی تھی جس کے بعد ہفتہ کو بائیڈن نے ایک پریس ریلیزجاری کرکے صدر کی جانب سے گولف کھیلے جانے کے حوالہ سے ان پر سخت تنقید کی۔
