واشنگٹن:موجودہ امریکی صدر ڈونالڈ ٹرمپ کو اس وقت بڑا دھکہ لگا جب علیحدہ امریکی عدالتوں نے چار ریاستوں جارجیا ، مشی گن ، نیواڈا اور وسکونسن میں ٹرمپ کی انتخابی مہم اور ان کے حامیوں کے صدارتی انتخابات کے نتائج کو پلٹنے کی کوشش پر فل اسٹاپ لگادیا۔ضلعی جج جیمس رسل نے جمعہ کو نیواڈا کی عدالت میں سماعت کے دوران کہا ، ’’صدارتی انتخابات کے نتائج کو چیلنج کرنے والا پورا معاملہ مکمل طور پر خارج کردیا گیا ہے۔‘‘انہوں نے کہا کہ ٹرمپ انتخابات کے نتائج کے خلاف لڑنے کے لئے قابل اعتماد اور متعلقہ ثبوت فراہم کرنے میں ناکام رہے ہیں۔وہیں مشی گن عدالت نے بھی ٹرمپ کی اپیل خارج کردی۔ عدالت نے کہا کہ اگر ٹرمپ کو انتخابات کی دھاندلی پر تشویش ہے تو انہیں ریاستی قانون کے مطابق کام کرنا چاہئے تھا جو انہوں نے نہیں کیا۔اس کے علاوہ جارجیا میں گیارہویں سرکٹ کورٹ آف اپیلس نے بھی ٹرمپ مہم کی اپیل مسترد کردی۔
