واشنگٹن ۔ 18 اکتوبر (ایجنسیز) یوکرینی صدر وولودیمیر زیلنسکی نے وائٹ ہاؤس میں امریکی صدر ڈونالڈ ٹرمپ سے ملاقات کیلئے اس بار اپنی روایتی فوجی وردی ترک کر کے ایک سیاہ کوٹ پہننے کو ترجیح دی۔امریکی صدر ٹرمپ نے گزشتہ روز یوکرینی ہم منصب سے وائٹ ہاؤس میں ملاقات کی۔ٹرمپ نے اس ملاقات کے دوران زیلنسکی کو مظاطب کرتے ہوئے ہلکے پھلکے انداز میں کہاکہ ’آپ اس کوٹ میں خوبصورت نظر آ رہے ہیں، یہ کوٹ واقعی بہت اسٹائلش ہے، یہ کوٹ مجھے پسند آیا ہے۔‘واضح رہے کہ یہ پہلا موقع نہیں کہ زیلنسکی نے ٹرمپ سے ملاقات میں لباس کا انداز بدلا ہو۔رواں سال اگست میں زیلنسکی کی صدر ٹرمپ کے ساتھ ہونے والی ملاقات میں یورپی رہنما بھی شریک ہوئے تھے، اس دوران بھی زیلنسکی نے فوجی وردی کے بجائے ایک منفرد لباس زیب تن کیا تھا جسے ٹرمپ کی جانب سے پذیرائی ملی تھی۔ اس سے قبل رواں سال فروری میں ٹرمپ نے زیلنسکی سے ملاقات کے دوران طنزیہ انداز میں کہا تھا کہ وہ آج خاص لباس میں آئے ہیں کیونکہ زیلنسکی نے اس ملاقات میں فوجی لباس پہن رکھا تھا۔