ممبئی۔ 14 ستمبر (سیاست ڈاٹ کام ) ہندوستانی کرکٹ کے یارکر کنگ بمراہ نے کہا کہ ٹسٹ کرکٹ میں سفید جرسی پہننے کا ان کا ایک بہت بڑا خواب تھا جو مکمل ہو گیا۔ بمراہ نے یہاں ایک پروگرام میں میڈیا نمائندوں سے اظہار خیال کرتے ہوئے کہا کہ شائقین کی محبت اور محنت سے آج وہ کرکٹ کے تینوں فارمیٹس میں ٹیم کی نمائندگی کر رہے ہیں۔ ان کے کرکٹ سفر کے سلسلے میں پوچھے گئے سوال پر انہوں نے کہا کہ آہستہ آہستہ ان کے کھیل میں اور پختگی آ رہی ہے اور آج وہ کرکٹ کے ہر فارمیٹ میں کھیل رہے ہیں۔ جب ان سے پوچھا گیا کہ آپ میدان میں اکثر پرسکون نظر آتے ہیں انہوں نے کہا کہ کبھی کبھی ہمیں بھی ناراضگی ہوتی ہے لیکن اگر ناراضگی پر قابو نہیں رکھا جائے تب اس سے اپنا ہی نقصان ہوتا ہے۔انہوں نے کہا کہ ورلڈ کپ میں کھیلنا ایک مختلف مہم جوئی پیدا کرتا ہے کیونکہ اس میں اپنے آپ ہی اضافی دباو ہوتا ہے لیکن خود پر یقین رکھنا بہت ضروری ہوتا ہے۔
