نئی دہلی :ہندوستان نے جموں و کشمیر پر پاکستان کی بیان بازی پر منگل کو سخت تنقید کرتے ہوئے کہا کہ پاکستان کو اپنے غیر قانونی اور جبری قبضے والے ہندوستانی علاقے کو فوری طور پر خالی کرنا چاہئے ۔وزارت خارجہ کے ترجمان رندھیر جیسوال نے پاکستان کی جانب سے کیے گئے تبصروں پر میڈیا کے سوالوں کا جواب دیتے ہوئے کہا کہ “یہ بات ہمارے نوٹس میں آئی ہے کہ پاکستان نے ایک بار پھر ہندوستانی مرکز کے زیر انتظام جموں و کشمیر کے بارے میں کچھ تبصرے کیے ہیں، دنیا جانتی ہے کہ اصل مسئلہ پاکستان کی سرگرم اور سرحد پار دہشت گردی کی سرپرستی ہے ۔مسٹر جیسوال نے کہا کہ درحقیقت یہ خطے میں امن اور سلامتی کی راہ میں سب سے بڑی رکاوٹ ہے ۔ پاکستان کو جھوٹ پھیلانے کی بجائے اپنے غیر قانونی اور جبری قبضے کے تحت ہندوستانی سرزمین کو خالی کرنا چاہیے ۔وزارت خارجہ کے ترجمان کا یہ تبصرہ پاکستان کے دفتر خارجہ کی جانب سے لیکس فریڈمین کے ساتھ پوڈ کاسٹ انٹرویو میں وزیر اعظم نریندر مودی کے تبصرے پر تبصرہ کے بعد آیا ہے۔
جس میں انہوں نے کہا تھا، “پاکستان کے ساتھ امن کو فروغ دینے کی ہر کوشش دشمنی اور دھوکہ سے سے ملی۔” انہوں نے امید ظاہر کی تھی کہ پاکستان کی قیادت دوطرفہ تعلقات کو بہتر بنانے کے لیے دانشمندی کا مظاہرہ کرے گی۔پاکستان کے دفتر خارجہ نے مسٹر مودی کے ریمارکس کو مسترد کرتے ہوئے کہا، “ہندوستانی وزیر اعظم کے تبصرے گمراہ کن اور یک طرفہ ہیں۔ وہ آسانی سے جموں و کشمیر کے تنازع کو چھوڑ دیتے ہیں، جو اقوام متحدہ، پاکستان اور کشمیری عوام کو ہندوستان کی سنگین یقین دہانیوں کے باوجود گزشتہ سات دہائیوں سے حل طلب ہے ۔دفتر خارجہ نے یہ بھی الزام لگایا کہ ہندوستان پاکستانی سرزمین پر پریشانی پیدا کرنے میں شامل ہے اور ہندوستان ‘غیر ملکی علاقوں میں ٹارگٹ کلنگ، تخریب کاری اور دہشت گردی کو انجام دینے ’ میں مصروف ہے ۔
