اسلام آباد: پا کستان کے جنوب مغربی صوبے بلوچستان کے ضلع شیرانی کے قریب اتوار کو شدید بارش کے دوران ایک مسافر بس پہاڑی راستے سے پھسل کر گہری کھائی میں جا گری۔حکام کے مطابق اس حادثے میں کم از کم 19 افراد کے ہلاک اور 12 کے زخمی ہونے کی اطلاع ہے۔شیرانی ضلع کے نائب ایڈمنسٹریٹر مہتاب شاہ کا کہنا ہے کہ اس بس میں 35 افراد سوار تھے۔ ابتدائی تحقیقات سے پتا چلتا ہے کہ ڈرائیور خطرناک اور پھسلن والے راستے پر بس تیزی رفتاری سے چلا رہا تھا اور اس دوران وہ بس پر قابو نہ پا سکا۔ یہ بس دو سو فٹ گہری کھائی میں گر گئی۔مہتاب شاہ نے بتایا کہ ریسکیو اہلکار امدادی سرگرمیوں میں مصروف ہیں۔ امدادی ٹیموں کی جانب سے زخمیوں کو ہسپتال پہنچایا جا رہا ہے۔ یہ بس اسلام آباد سے کوئٹہ کی طرف سفر کر رہی تھی۔پاکستان میں سٹرکوں پر ہولناک حادثات عام ہیں۔ ملک میں سڑکوں کا انفراسٹرکچر انتہائی ناقص ہے۔ دور دراز مقامات اور خاص طور پر پہاڑی سلسلوں میں ٹریفک حادثات کا خدشہ زیادہ رہتا ہے۔ ٹریفک قوانین پر عمل در آمد بھی کمزور ہے اور اکثر اوقات بہت خراب حالت والی مسافر بسیں سفر جاری رکھتی ہیں۔ گزشتہ ماہ قلعہ سیف اللہ ضلع میں ایسے ہی ایک حادثے میں 22 افراد ہلاک ہو گئے تھے-
