کراچی، 2جولائی (سیاست ڈاٹ کام) پاکستان میں قدرتی گیس کے ٹیکس میں بے تحاشااضافہ کئے جانے سے سی این جی پر مبنی شعبوں کے دیوالیہ ہونے اور ہزاروں لوگوں کے بیروزگار ہونے کا خطرہ منڈلانے لگا ہے ۔آل پاکستان سی این جی اسوسی ایشن قدرتی گیس ٹیکس میں اس غیر معمولی اضافہ کے بعد ملک گیر ہڑتال کا راستہ اختیار کر سکتی ہے ۔ سی این جی کے سیکٹر سے منسلک ایک رہنما نے پیر کو یہ اعلان کیا۔اے پی سی این جی اے کے صدر اافتخار احمد نے کہاقدرتی گیس کے ٹیکس میں 31فیصد کے غیرمعمولی اضافہ سے سی این جی سیکٹر کے دیوالیہ ہونے سے ہزاروں افراد بیروزگار ہو جائیں گے۔ احمد نے کہا کہ اس اضافہ سے نہ صرف عام آدمی اور گیس کا استعمال کرنے والے کاروبار پر اثر پڑیگا بلکہ مستقبل میں سرمایہ کاری پر بھی اثر پڑیگا جس میں غیر ملکی سرمایہ کاری سے مائع قدرتی گیس (ایل این جی) ٹرمینل کی تعمیر بھی شامل ہے ۔