لاہور: پاکستان ویمنس کرکٹ ٹیم نے ونڈے میچ میں سدرا امین کے شاندار 176 رنز اور منیبہ علی کے 107 رنز کی بدولت تاریخ میں پہلی بار 300 سے زائد رنز اسکور کرتے ہوئے 3 وکٹوں کے نقصان پر 335 رنز بنا ڈالے اور آئرلینڈ ویمن ٹیم کو 128 رنز کے بھاری فرق سے شکست دے دی۔ ہدف کے تعاقب میں آئرلینڈ ٹیم 50 ویں اوور میں 207 رنز پر ڈھیر ہو گئی۔ ان کی کپتان لورا نے 69 رنز بنائے۔ پاکستان اور آئرلینڈ کے درمیان لاہور میں میزبانوں نے ٹاس جیت کا پہلے بیٹنگ کرنے کا فیصلہ کیا، جو سود مند ثابت ہوا۔ آئی سی سی ویمن چمپینس ٹرافی میں شامل سیریز میں سدرا اور منیبہ نے پہلی وکٹ کیلئے ریکارڈ 221 رنز کی شراکت قائم کی۔ سدرا نے شاندار اور جارحانہ بیٹنگ کرتے ہوئے 151 گیندوں پر 20 چوکوں اور ایک چھکے کی مدد سے 176 رنز بنائے اور ناٹ آؤٹ رہیں۔ انہیں اس کارکردگی پر میچ کی بہترین کھلاڑی قرار دیا گیا۔ سدر ا نے پاکستان کی جانب سے جویریہ خان کے2015 میں سری لنکا کے خلاف بنائے گئے 133 رنز کا ریکارڈ توڑ دیا۔ وہ دنیا بھر میں انفرادی طور پر زیادہ رنز بنانے والوں کی فہرست میں بھی پانچویں نمبر پر آگئی ہیں۔ منیبہ نے 108 گیندوں پر اپنی پہلی سنچری اسکور کی۔ وہ ونڈے انٹرنیشنل میں پاکستان کی جانب سے سنچری بنانے والی چوتھی کھلاڑی ہیں۔ آئرش ٹیم کی جوابی اننگز میں پاکستان کیلئے ندا ڈار نے شاندار بولنگ کی اور 34 رنز دے کر 3 وکٹ لئے۔ نشریٰ سندھواور فاطمہ ثنا کو 2، 2 وکٹ لئے جبکہ کائنات امتیاز اور عالیہ ریاض کو ایک، ایک وکٹ ملی۔
