اسلام آباد: افغانستان میں امریکی ڈرون حملے میں القاعدہ کے لیڈر ایمن الظواہری کی موت کے بعد وزارت خارجہ نے کہا ہے کہ پاکستان دہشت گردی کی اس کی تمام شکلوں اور مظاہر کی سخت مذمت کرتا ہے ۔پاکستان کی وزارت خارجہ نے چہارشنبہ کے روز پاکستانی میڈیا کے سوالوں کے جواب میں جاری کردہ ایک مختصر بیان میں کہا کہ دہشت گردی کے خلاف جنگ میں پاکستان کا کردار اور قربانیاں سب کو معلوم ہیں۔ وزارت خارجہ کے ترجمان نے کہا کہ انہوں نے امریکہ کے سرکاری بیانات اور افغانستان میں امریکی کارروائیوں کے حوالے سے میڈیا رپورٹ دیکھی ہے ۔بیان میں کہا گیا ہے کہ پاکستان بین الاقوامی قانون اور اقوام متحدہ کی متعلقہ قراردادوں کے مطابق دہشت گردی کے خلاف اپنی کوششوں پر قائم ہے۔واضح رہے کہ القاعدہ کے لیڈر ایمن الظواہری منگل کے روز افغانستان کے دارالحکومت کابل میں امریکی انسداد دہشت گردی دستہ کی کارروائی میں مارے گئے ۔ امریکی صدر جو بائیڈن نے بعد میں اس کی تصدیق کی ہے ۔ بائیڈن نے اس کی تصدیق کرتے ہوئے کہا کہ حملہ ہفتہ کے روز کابل میں کیا گیا۔ انہوں نے کہا کہ میں نے اس کی حتمی منظوری دے دی تھی۔ انہوں نے کہا کہ کوئی شہری ہلاکت یا نقصان نہیں ہوا۔
