پرتھ ۔22 نومبر ( سیاست ڈاٹ کام ) آسٹریلیا نے اوپنرز خصوصاً ڈیوڈ وارنر کی شاندار سنچری کی بدولت پاکستان کے خلاف پہلے ٹسٹ میچ میں دوسرے دن ہی اپنی گرفت مضبوط کرتے ہوئے پہلی اننگز میں ایک وکٹ کے نقصان پر 312رنز بنا کر میچ پر گرفت مضبوط کر لی ہے۔ برسبین میں کھیلے جا رہے سیریز کے پہلے ٹسٹ میچ میں پاکستانی ٹیم میچ کے پہلے دن 240 رنز بنا کر آؤٹ ہو گئی تھی میچ کے دوسرے دن آسٹریلیا نے بیٹنگ شروع کی تو پاکستانی بولروں نے اننگز کی ابتدا میں بیٹسمینوںکو تھوڑا پریشان کیا لیکن چند اوورز بعد دونوں اوپنرز کے سامنے پاکستانی بولرس بالکل بے بس نظر آئے۔ اوپنرس نے اپنی اپنی نصف سنچریاں مکمل کر کے ٹیم کو مستحکم موقف فراہم کیا۔ نسیم شاہ نے 56 کے انفرادی اسکور پر ڈیوڈ وارنرکو آوٹ کردیا لیکن 16سالہ فاسٹ بولر اس وقت بدقسمت ثابت ہوئے جب تھرڈ امپائر نے اس گیندکو نوبال قرار دے دیا۔ اس کے بعد انتہائی کوشش کے باوجود پاکستانی بولرس چائے کے وقفے تک کوئی وکٹ لینے میں ناکام رہے اور آسٹریلین اوپنرز نے نے دو سیشنز میں بغیر کسی نقصان کے 195رنز بنا ئے ۔ چائے کے وقفے کے فوراً بعد ڈیوڈ وارنر نے اپنی سنچری اور اوپنرز نے اپنی ڈبل سنچری شراکت مکمل کی۔ یہ وارنرکی بال ٹیمپرنگ اسکینڈل میں ایک سالہ پابندی کے بعد ٹسٹ کرکٹ میں پہلی سنچری ہے جہاں وہ ایشز سیریز میں بری طرح ناکام رہے تھے۔ پاکستان کو اننگز میں بالآخر پہلی کامیابی اس وقت ملی جب 222 کے مجموعی اسکور پر یاسر شاہ نے جوبرنزکی وکٹیں بکھیر دیں جو نروس نائنٹیز کا شکار ہو کر 97رنز پر وکٹ گنوا بیٹھے۔ آسٹریلیا نے جلد ہی پاکستان کے پہلی اننگز کے اسکور تک رسائی حاصل کر کے میچ میں برتری حاصل کر لی اور ڈیوڈ وارنر نے بہترین کھیل کا سلسلہ جاری رکھتے ہوئے اپنے 150رنز مکمل کر لیے۔ جب میچ کے دوسرے دن کا کھیل ختم ہوا تو آسٹریلیا نے ایک وکٹ کے نقصان پر 312 رنز بنائے تھے اور پاکستان کے خلاف 72رنز کی برتری حاصل کر لی ہے۔ اوپنر ڈیوڈ وارنر اب تک 10چوکوں کی مدد سے 151 رنز بنا چکے ہیں جبکہ مارنس لبوشین نے 55رنز بنائے ہیں۔
