لاہور ۔ پاکستانی سلیکشن کمیٹی نے دورہ انگلینڈ اوردورہ آئرلینڈ کے لیے 18 رکنی پاکستانی اسکواڈ کا اعلان کردیا۔ لاہور میں پریس کانفرنس کرتے ہوئے سلیکشن کمیٹی ٹیم نے کہا کہ فاسٹ بولر حارث رؤف کے ساتھ آل راؤنڈر حسن علی اور سلمان علی آغاکو 18 رکنی اسکواڈ میں دوبارہ شامل کیا گیا ہے۔ نیوزی لینڈ کے خلاف حالیہ ہوم سیریزکے 17کھلاڑیوں کے اسکواڈ میں شامل اسپنر اسامہ میر اور فاسٹ بولر زمان خان ٹیم میں جگہ بنانے میں ناکام رہے ہیں۔ سلیکشن کمیٹی نے بتایا کہ ٹیم میں بابر اعظم، ابرار احمد، اعظم خان، فخر زمان شامل ہیں، اس کے علاوہ حارث رؤف، حسن علی، افتخار احمد، عماد وسیم، محمد عباس آفریدی، محمد عامر، محمد رضوان، عرفان خان نیازی، نسیم شاہ، صائم ایوب بھی ٹیم کا حصہ ہیں۔ اسکواڈ میں سلمان علی آغا، شاداب خان، شاہین شاہ آفریدی اور عثمان خان بھی شامل ہیں۔ اسامہ میر کی جگہ حارث رؤف کو شامل کیا گیا ہے۔ سلیکشن کمیٹی کے رکن محمد یوسف نے کہا کہ نیوزی لینڈ کے خلاف میچز میں ہمارا اسکواڈ 17 کا تھا، اس میں ہم نے ایک کا اضافہ کیا ہے۔ عبدالرزاق نے کہا کہ ہمارے پاس ورلڈ کپ اسکواڈ کا اعلان کرنے کے لیے وقت ہے۔ رکن سلیکشن کمیٹی وہاب ریاض نے بتایا کہ حارث رؤف، اعظم خان، عرفان نیازی اور محمد رضوان کی فٹنس میں بہتری آئی ہے، امید ہے کہ تینوں کھلاڑی آئرلینڈ کی سیریز کے لیے دستیاب ہوں گے۔ وہاب ریاض نے کہا کہ ہم سب ایک صف میں ہیں، ہمیں امید ہے کہ حارث انگلینڈ سیریز تک فٹ ہوجائیں گے، 21 تاریخ کے انگلینڈ میچ کے بعد ہم ورلڈکپ اسکواڈ کا اعلان کردیں گے۔ عثماں خان کی سلیکشن سے متعلق بات کرتے ہوئے وہاب ریاض نے کہا کہ عثمان خان نے پی ایس ایل میں بہترین مظاہرہ کیا ، وہ انٹرنیشنل کرکٹ میں اس طرح سے کامیاب نہیں ہوسکے لیکن انہیں وقت دینا پڑے گا۔ عبدالرزاق نے بتایا کہ صائم ایوب نیوزی لیند میں کارکردگی نا دکھا سکے لیکن وہ باصلاحیت ہیں، ہمیں پھر بھی امید ہے کہ وہ اچھا مظاہرہ کریں گے۔ آئرلینڈ اور انگلینڈ کے خلاف پاکستانی ٹیم: بابر اعظم (کپتان)، ابرار احمد، اعظم خان، فخر زمان، حارث رؤف، حسن علی، افتخار احمد، عماد وسیم، محمد عباس آفریدی، محمد عامر، محمد رضوان، محمد عرفان خان، نسیم شاہ، صائم ایوب، سلمان علی آغا، شاداب خان، شاہین شاہ آفریدی اور عثمان خان ۔
