17 سالہ محمد ندیم زخمی ۔ دواخانہ میں زیر علاج ۔ امجد اللہ خاں خالد نے عیادت کی
حیدرآباد 7 اکٹوبر ( سیاست نیوز ) فرقہ وارانہ ذہنیت کے اثرات حیدرآباد میں بھی دکھائی دینے لگے ہیں جہاں پرانے شہر کے سلطان شاہی میں ایک 17 سالہ مسلم ڈیلیوری بوائے کو نام پوچھ کر مارپیٹ کا نشانہ بنایا گیا ۔ اس واقعہ میں ڈیلیوری بوائے زخمی ہوگیا جسے علاج کیلئے دواخانہ عثمانہ منتقل کیا گیا ہے ۔ تفصیلات کے بموجب درگاہ زہرہ بی صاحبہ عیدی بازار کا ساکن 17 سالہ محمد ندیم کسی آن لائین کمپنی کے ڈیلیوری بوائے کا کام کرتا ہے ۔ منگل کی شام ندیم کچھ سامان پہونچانے جا رہا تھا کہ اچانک تیز بارش شروع ہوگئی ۔ ندیم نے ایک گھر کے سایہ میں پناہ لی ۔ اس پر ایک مقامی شخص اچانک وہاں پہونچا جس نے ندیم کے وہاں ٹہرنے پر سوال کیا ۔ اس کا نام پوچھا ۔ جب ندیم نے اپنا نام بتایا تو یہ شخص مزید برہم ہوگیا اور اس سے گلی گلوچ اور بحث و تکرار کرنے لگا ۔ اچانک گھر سے ایک اور نوجوان نکلا اور دونوں نے ندیم کو شدید مارپیٹ اور زد و کوب کا نشانہ بنایا ۔ ندیم کسی طرح بچ کر مغلپورہ پولیس اسٹیشن پہونچا اور شکایت درج کروائی ۔ مغلپورہ پولیس نے ندیم کو علاج کیلئے دواخانہ عثمانیہ منتقل کیا ۔ اطلاع ملنے پر ترجمان مجلس بچاؤ تحریک امجد اللہ خاں خالد نے عثمانیہ دواخانہ پہونچ کر ندیم کی عیادت کی اور ڈاکٹرس سے بات چیت کی ۔ امجد اللہ خاں خالد نے اس طرح کے واقعہ پر شدید برہمی کا اظہار کیا اور پولیس سے مطالبہ کیا کہ خاطیوں کی نشاندہی کرکے ان کے خلاف سخت کارروائی کی جائے۔
