حیدرآباد۔/16 جولائی، ( سیاست نیوز) متحدہ محبوب نگر ضلع میں 20 جولائی کو جنرل سکریٹری اے آئی سی سی پرینکا گاندھی کا مجوزہ دورہ اور جلسہ عام ملتوی ہوچکا ہے۔ صدر پردیش کانگریس ریونت ریڈی کے مطابق سابق وزیر جوپلی کرشنا راؤ کی کانگریس میں شمولیت کے سلسلہ میں 20 جولائی کو کولا پور میں جلسہ عام طئے کیا گیا تھا۔ مقامی کانگریس قائدین جلسہ عام میں پرینکا گاندھی کی شرکت کے خواہاں تھے لیکن ان کے بیرونی دورہ کے سبب صدر کانگریس ملکارجن کھرگے کا نام تجویز کیا گیا۔ بتایا جاتا ہے کہ کھمم میں سابق رکن پارلیمنٹ سرینواس ریڈی کی کانگریس میں شمولیت کے موقع پر راہول گاندھی نے جلسہ عام میں شرکت کی تھی۔ کھمم کی طرز پر کولا پور میں بڑے جلسہ عام کا منصوبہ بنایا گیا جس میں پرینکا گاندھی ویمنس ڈیکلریشن جاری کرنے والی تھیں۔ بتایا جاتا ہے کہ پرینکا گاندھی کے بیرونی دورہ کے پیش نظر 20 جولائی کا جلسہ عام ملتوی کردیا گیا ہے۔ پرینکا گاندھی 21 جولائی کو ہندوستان واپس ہورہی ہیں لہذا 26 جولائی کو جلسہ عام کا وقت حاصل کیا جائے گا۔ ریونت ریڈی 18 جولائی کو نئی دہلی روانہ ہورہے ہیں جہاں وہ راہول گاندھی اور پرینکا گاندھی سے ملاقات کرتے ہوئے 26 جولائی کے پروگرام کو قطعیت دیں گے۔ر
